UBT-nyń jańa formatta ótkizilýi óte oryndy - mektep muǵalimi
ASTANA. QazAqparat - Búgin Astana qalasy Esil aýdanyna qarasty orta mektepterdiń dırektorlarynyń qatysýymen Elbasy Nursultan Nazarbaevtyń Qazaqstan halqyna Joldaýyn talqylaýǵa arnalǵan dóńgelek ústel ótti, dep habarlaıdy QazAqparat.
«Qazirgi ýaqytta bilim salasynyń aldynda óte úlken máseleler bar. Bilimdi urpaq - qoǵamymyzdyń bolashaǵy. Sondyqtan júıeli túrde bas qosyp, aldymyzda turǵan barlyq ózekti máseleni jiti talqylap otyrýǵa tıispiz. Ózderińizde bilesizder, Prezıdentimiz oqýshylardy otansúıgishtikke, birlik pen toleranttylyqqa baýlý baǵytyndaǵy jumystardy kúsheıtýdi tapsyrǵan bolatyn. Osyǵan oraı búgin elordanyń Esil aýdanyna qarasty mektepterdiń dırektorlarymen, oqý isi jónindegi meńgerýshilermen osy máselelerge qatysty pikir almasatyn bolamyz», - dedi dóńgelek ústel otyrysyn ashqan Astana qalalyq máslıhatynyń depýtaty, №17 gımnazııanyń dırektory Ramzııa Ómirbaeva.
Shara barysynda №17 gımnazııasynyń orys tili men ádebıeti muǵalimi Aıgúl Óteýbaeva aǵymdaǵy jyly eki kezeńmen ótkiziletin Ulttyq biryńǵaı testileýge keńinen toqtaldy.
«Ózderińizde biletindeı, bıyl Ulttyq biryńǵaı testileýdiń formaty ózgertilip, eki kezeńmen ótetin bolady. Osyǵan baılanysty bizdiń jumysymyzdyń da ózgeretindigi túsinikti. Jalpy Elbasy Joldaýynda ustazdar qaýymynyń da ózgerýi, bilim mazmunymyz 1-synyptan bastap jańǵyrýy kerektigin basa aıtqan bolatyn. Demek, UBT formatynyń ózgerýi de oryndy. Ózim №17 gımnazııanyń muǵalimderdi jańa ádisterge baýlý jónindegi jattyqtyrýshysymyn. Bıyl 12 muǵalimdi jańartylǵan baǵdarlamaǵa sáıkes daıyndadym», - dedi ol.
Dóńgelek ústel otyrysynda Elbasynyń Joldaýy, taıaýdaǵy «Bolashaqqa kózqaras: qoǵamdyq sanany jańǵyrtý» maqalasy jan-jaqty talqylanyp, bilim berýdiń rólin arttyrý, úsh tilde oqytýdy engizý máseleleri sóz boldy.
