UBT-nyń sońǵy nátıjesi tamyzda jarııalanady

NUR-SULTAN. QazAqparat – Ulttyq biryńǵaı testileýdiń beınejazbalary 25 tamyzǵa deıin taldaýdan ótedi. Bul týraly QR Bilim jáne ǵylym vıtse-mınıstri Qýanysh Erǵalıev aıtty, dep habarlaıdy QazAqparat tilshisi.

«Bıyl Ulttyq biryńǵaı testileýdiń sońǵy nátıjesi tamyz aıynda belgili bolady. Qoldanystaǵy qaǵıdalarǵa sáıkes, barlyq beınejazbalar osy jylǵy 25 tamyzǵa deıin taldaýdan ótedi. Túsýshi tyıym salynǵan zattardy paıdalanǵany anyqtalǵan jaǵdaıda testileý nátıjeleri joıylatyn bolady jáne bilim berý grantyn taǵaıyndaý sheshiminiń de kúshi joıylady», - dedi ol mınıstrliktiń apparat jınalysynda.

Vıtse-mınıstrdiń aıtýynsha, mundaı tájirıbe ótken jyldan beri bar. Byltyr 152 test tapsyrýshynyń nátıjesi joıylǵan bolatyn.

«Tipti, 100 bilim berý granty ıegeri de joǵary oqý oryndarynan dáris alý múmkindiginen aıyrylǵan edi. Sonymen qatar 20 jáne odan joǵary ball aıyrmashylyǵy bar testileýshilerdiń beınejazbalary muqııat taldanady. Bul beınejazbalardyń barlyǵy bizde saqtaýly», - dedi Qýanysh Erǵalıev.

Testileý barysynda birqatar akademııalyq adaldyqty buzý faktileri oryn alǵan. Atap óter bolsaq, talapkerlerdiń jasyryn kameralarmen kelýi, shaǵyn qulaqqaptardy qoldanýy, 45 ólshemdi krassovka kıip, ultaraqtyń ornyna smartfon salý, medıtsınalyq maskalardyń ishki jaǵyna qajetti jazbalar jazý jáne taǵy basqa da ádiletsizdikterge barý oryn aldy», - dep atap ótti Qýanysh Erǵalıev.