UBT-nyń ashyqtyǵyn qamtamasyz etetin usynystar ázirlenbek
ASTANA. QazAqparat - Kelesi jyldyń qańtar, aqpan aılarynda buqaralyq aqparat quraldarynda Ulttyq biryńǵaı testileýdiń ashyqtyǵyn qamtamasyz etetin usynystar jarııalanady.
Bul týraly búgin respýblıkalyq tamyz konferentsııasyna qatysqan Premer-Mınıstrdiń orynbasary Berdibek Saparbaev málim etti.
«Ulttyq biryńǵaı testileýge baılanysty másele kóp. Mınıstrlik testileý oıdaǵydaı ótti, oqýshylardyń bilim deńgeıi jaqsy dep esep berdi. Biraq, báribir aryz-shaǵym azaıǵan joq. Bilim basqarmalary, mektep dırektorlary men ákimdikter statıstıkanyń sońyna túsip, UBT-ǵa barynsha kóp oqýshy qatyssa jáne joǵary ball jınasa boldy deıdi. Biraq, bul durys emes»,-dedi B.Saparbaev.
Úkimet basshysy orynbasarynyń aıtýynsha, ulttyq biryńǵaı testileýdiń ashyqtyǵyn qamtamasyz ete túsý kerek.
«Taǵy bir aıta keterligi, ata-analardyń kóbi Ulttyq biryńǵaı testileýdiń tártibin, ondaǵy suraqtardyń qandaı bolatynyn bilmeımiz deıdi. ıAǵnı, ashyqtyq joq. Sondyqtan, Bilim mınıstrligine ákimdiktermen birge ótken jyldyń qorytyndysy boıynsha aryz-shaǵymdardyń barlyǵyn qarap, óz usynystaryn engizýdi tapsyramyn. Múmkin barlyq oblysta tıisti jumys tobyn qurý kerek shyǵar. Keıin, sol usynystardy mınıstrlikke tapsyrsa, biz ol usynystardy qarap, jyl sońyna Ulttyq biryńǵaı testileýdiń ashyqtyǵyn qamtamasyz etetin ózgerister engizemiz dep oılaımyn. Kelesi jyldyń qańtar-aqpan aılarynda sol ózgerister týraly BAQ-tarǵa jarııalaımyz»,-dedi B.Saparbaev.
