UBT-nyń ádil ótýi qalaı baqylandy

NUR-SULTAN. QazAqparat – QR Bilim jáne ǵylym vıtse-mınıstri Qýanysh Erǵalıev bıyl Ulttyq biryńǵaı testileýdi ádil ótkizý úshin qandaı sharalar qabyldanǵanyn atady, dep habarlaıdy QazAqparat tilshisi.

«Ulttyq biryńǵaı testileý ótkizý pýnktterinde tıisti erejelerdiń saqtalýyn baqylaýdy testileý ákimshileri júzege asyrdy. Olardyń jalpy sany 150 adam boldy. Uıymdastyrý máselelerin sheshý jáne UBT-ny ótkizýdiń monıtorıngisin júrgizý úshin jergilikti bilim berý uıymdarynyń basshylary, quqyq qorǵaý organdarynyń, qoǵamdyq uıymdar men BAQ ókilderinen 648 adamnan turatyn óńirlik memlekettik komıssııalar quryldy. Bilim salasyndaǵy sapany qamtamasyz etý departamentiniń 20 qyzmetkeri jáne arnaýly monıtorıng top pen Adaldyq alańy qatarynan 14 baqylaýshy qatysty», - dedi ol mınıstrliktiń apparat jınalysynda.

Onyń atap ótýinshe, testileý ótý barysyna Ulttyq testileý ortalyǵynda ornalasqan Ahýaldyq ortalyq arqyly ortalyqtandyrylǵan baqylaý júrgizildi.

«Sonymen qatar árbir testileý ótkizý pýnktinde onlaın kórsetilim uıymdastyryldy. Atalǵan qyzmet kórsetýler testileý kezinde ereje buzýshylyqtardyń sanyn aıtarlyqtaı azaıtýǵa múmkindik berdi. Óıtkeni, árbir orynnyń ústinde ornatylǵan kamera arqyly baqylandy jáne testileýdiń ótý barysyn baqylaýǵa nıet bildirgen azamat Qazaqstannyń kez kelgen jerinen testileýdi baqylady», - dedi Qýanysh Erǵalıev.