UBT-ny stadıonda ótkizbeýdiń sebebi túsindirildi
Onlaın rejımde ótken baspasóz máslıhatynda Ulttyq biryńǵaı testileýdi stadıonda nemese onlaın formatta ótkizý múmkindigi týraly suraldy.
«Biz stadıonda ótkizý jaǵyn qarastyrǵan bolatynbyz. Zertteýler nátıjesinde, stadıonda bir kúnde 500-600 adam jınalatyny, al aýdıtorııada 15-25 adam otyratyny anyqtaldy. Osy kórsetkishterdi alyp qarasaq, UBT-ny aýdıtorııada ótkizý qaýipsiz bolyp otyr» - dedi D. Smaǵulov Ortalyq komýnıkatsııalar qyzmetinde.
Osy oraıda ol aýdıtorııalar tek 50 paıyzǵa ǵana toltyrylatynyn, sáıkesinshe qaýiptilik deńgeıi tómendeıtinin atap ótti.
Budan buryn habarlanǵandaı, Dıdar Smaǵulov bıylǵy UBT-ny ótkizý tártibi jaıynda túsinik berdi.
Karantındik shekteýlerge baılanysty eldiń barlyq aımaqtaryndaǵy UBT ótkizý oryndarynda kúsheıtilgen medıtsınalyq-sanıtarlyq sharalar engiziledi. Ǵımaratqa kirgizý kezinde test tapsyrýshylardyń arasyndaǵy eki metrlik araqashyqtyqty qatań saqtaý arqyly maskaly rejım júzege asyrylady. Ár test tapsyrýshy 5 baqylaý kezeńinen ótetin bolady, onyń ishinde syrtqy kıimdi dezınfektsııalyq eritindilermen zalalsyzdandyratyn arnaıy dáliz arqyly ótý eskerilgen.
«Ár qabattaǵy dálizderde sanıtaızerler ornatylady. Aýdıtorııada test tapsyrýshylardy otyrǵyzý keminde eki metr araqashyqty saqtaý arqyly júzege asyrylady. Bul rette aýdıtorııa únemi jeldetiledi», - dedi Dıdar Smaǵulov.
