UBT-ny onlaın rejımde tapsyrý múmkindigi qarastyrylyp jatyr
ASTANA. 9 jeltoqsan. QazAqparat - UBT-ny onlaın rejımde tapsyrý múmkindigi qarastyrylyp jatyr. Búgin Májiliste ótken Úkimet saǵatynda Bilim jáne ǵylym mınıstri Aslan Sárinjipov osylaı málim etti.
Bilim mınıstriniń aıtýynsha, 2014 jyly ulttyq biryńǵaı testileý júıesinde esh ózgeris bolmaıdy. Degenmen, 2015 jyldan bastap atalǵan júıege jańa elementter ene bastaıdy.
«Osy baǵytta mazmundy jańartýdaǵy aýqymdy jumystar aıasynda daǵdy men quzyrettilikke basymdyq barynsha beriledi, alaıda baǵalaý júıesi de mazmundy qamtýy shart. Osyǵan oraı, UBT júıesi jańǵyrtylady. 2014 jyly bul júıe sol qalpynda bolǵanymen, 2015 jylǵa qaraı jańalyqtar enetini josparlanyp otyr», - deıdi mınıstr. Onyń aıtýynsha, UBT jetildirý úshin jańa tehnologııalar tartylady. «Sonymen qatar, UBT onlaın rejıminde, ınternetti paıdalaný arqyly tapsyrý múmkindigin de beremiz. Bul halyqaralyq tájirıbede bar: SAT, TOEFL, IELTS onlaın-rejımmen tapsyrylady. Bundaı UBT-ny biz Qazaqstanda da engizýge tıispiz. Budan bólek, UBT qorytyndylary boıynsha stýdentterdi qabyldaý úshin joǵary oqý oryndary krıterıılerdi óz betinshe bekitý máselesin qaraýdy da josparlaımyz. Avtonomııa aıasynda joǵary oqý oryndary stýdentter úshin ózara básekelese alady», - dedi A. Sárinjipov.
