UBT-nyń jańa formatyn engizý 2027 jyly pedagogıkalyq baǵyttan bastalady
ASTANA. KAZINFORM — UBT-ǵa balama retinde ázirlenip jatqan jańa AIT (Admission Insight Test) testin pılottyq rejımde engizý 2027 jyly pedagogıkalyq baǵyttardan bastalady. Bul týraly Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıtetiniń tóraǵasy Gúljan Jarasova málim etti.
— Qazir sheteldik sarapshylarmen birlesip jańa qazaqstandyq AIT testin ázirleý jumystary júrgizilip jatyr. Kelesi jyly pedagogıkalyq baǵyttarǵa túsýshiler úshin arnaıy emtıhandar ótkizilip, onda jańa formattaǵy test tapsyrmalary qoldanylady, — dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, pılottyq jobaǵa Qazaqstanda jumys istep jatqan sheteldik joǵary oqý oryndarynyń birqatar fılıaly qatysady.
— Qazir jobaǵa qatysty máseleler áli talqylanyp jatyr. Biz eki kezeń aıasynda jańa formattyń negizgi tásilderin aıqyndadyq. Alaıda ázirge jańa formattaǵy test tapsyrmalary ázirlengen joq. Sondyqtan onyń qalaı qoldanylatyny jáne qandaı kólemde engiziletini týraly aıtýǵa áli erte, — dedi Gúljan Jarasova.
Eske salaıyq, Qazaqstandaǵy Admission Insight Test (AIT) testin testologııa salasyndaǵy álemdik jetekshi kompanııalardyń biri — ETS ázirlep jatyr.
UBT-nyń formaty men mazmunyn jańartý jumystary 2029 jylǵa deıin kezeń-kezeńimen júrgiziledi.
