UBT-nyń jańa formaty qandaı múmkindik beredi - sarapshy túsindirdi

ASTANA. KAZINFORM – Qazaqstanda Ulttyq biryńǵaı testileýdiń mazmuny men qurylymy túbegeıli jańaryp, halyqaralyq úlgige negizdelgen jańa format engizilmek. Ózgeris halyqaralyq oqý oryndaryna jol ashýdy kózdeıdi. Jańashyldyqtar jaıyn bilim granttary jónindegi sarapshy Jasulan Bostandyquly Jibek Joly arnasynyń «Búgin LIVE» baǵdarlamasynda aıtty.

Sarapshy aldymen qoldanystaǵy UBT mehanızmin taldady.

– Qoldanystaǵy júıe boıynsha túlek 5 pánnen test tapsyrady: úsheýi – mindetti (matematıkalyq saýattylyq, oqý saýattylyǵy, Qazaqstan tarıhy), qalǵan ekeýi – tańdaǵan mamandyǵyna qaraı beıindi pánder. Matematıkalyq jáne oqý saýattylyǵy árqaısysy 10 tapsyrmadan turady, Qazaqstan tarıhynan 20 tapsyrma, al eki beıindik pánnen 40 tapsyrma beriledi. Jalpy ball – 140. Ár pán boıynsha bólek shekti deńgeı qoıylǵan: matematıkalyq jáne oqý saýattylyǵy úshin keminde 3 ball, Qazaqstan tarıhy úshin keminde 5 ball, al ár beıindik pánnen de keminde 5 ball jınaý kerek, – dedi Jasulan Bostandyquly.

Sarapshy túlekterge beriletin múmkindiktiń biri – testti birneshe ret tapsyrý quqyǵy ekenin atap ótti.

– Qazir UBT-ny 5 ret tapsyrýǵa múmkindik bar. Túlek alǵan sertıfıkatymen ári grant konkýrsyna, ári aqyly bólimge qujat ótkize alady. Biraq ol úshin jalpy jınaǵan baly bazalyq shekten tómen bolmaýy tıis, – deıdi maman.

Alaıda aldaǵy jyldary bul mehanızm jańa baǵytta damıdy. Sarapshy muny álemdegi tehnologııalyq ózgeristermen baılanystyrdy.

– Jasandy ıntellekt damyp jatyr. Sondyqtan ýaqyt talabyna saı UBT da transformatsııalanady. Ǵylym jáne joǵary bilim mınıstriniń AQSh-qa sapary aıasynda Vashıngtonda ETS dep atalatyn dúnıejúzindegi eń myqty test jasaıtyn kompanııamen kelisimshartqa qol qoıyldy. Onyń aıasynda qazaqstandyq túlekterge bolashaqta eki tańdaý beriledi: dástúrli ulttyq testti tapsyrý nemese sheteldik ýnıversıtetter men Qazaqstandaǵy sheteldik fılıaldar moıyndaıtyn jańa halyqaralyq testini tańdaý, – deıdi sarapshy.

Onyń aıtýynsha, jańa format birden enbeıdi, alda aýqymdy jumys bar.

– ETS – álemdegi eń kóne synaq júıesi. Arnaıy jumys toby qurylyp, ETS mamandarynyń qatysýymen UBT-nyń ádistemesi men mazmuny qaıta qaralady. Bul test logıkalyq jáne synı oılaý, fýnktsıonaldyq saýattylyq, kommýnıkatsııa jáne aqparatpen jumys isteý qabiletin baǵalaıtyn qosymsha komponentti qamtıdy. Odan ótken jaǵdaıda Qazaqstanda ashylǵan sheteldik fılıaldarǵa jáne kez kelgen sheteldik ýnıversıtetke túsý múmkin bolady, – dedi ol.

Sarapshy grant júıesi týraly da pikir bildirdi.

– Elimizde 12-den astam bilim granttary bar. Bul – qazirgi UBT-nyń júıesine negizdelgen grant sany. Meniń oıymsha, aldaǵy ýaqytta grant sany azaımaıdy, tek ony bólý metodıkasynda ózgerister oryn alýy múmkin, – dedi Jasulan Bostandyquly.

Aıta keteıik, jaqynda Talǵardaǵy tórtinshi synyptyń eki oqýshysy Malaızııadaǵy halyqaralyq mektep grantyn jeńip aldy.