UBT-nyń jańa formaty: 2026 jyly testileýde ózgeris bolmaıdy
ASTANA. KAZINFORM — Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti UBT-ny jetildirýge qatysty túsinik berdi.
- Qazaqstandyq UBT-ny úzdik ádisnamasy men sapasy bar halyqaralyq testileý júıesine aınaldyrý úshin arnaıy jumys toby quryldy. Jumys tobynyń qyzmeti aıasynda Educational Testing Service (ETS) dúnıejúzilik tekstologııalyq kompanııasynda oqytý úshin ázirleýshiler men sarapshylardyń tizimderin daıyndaý, UBT-ny kezeń-kezeńimen jetildirý boıynsha bes jyldyq josparyn ázirleý jáne ETS kompanııasymen birlesip UBT formatyn jetildirý boıynsha ádisnamany ázirleý josparlanyp otyr, - delingen vedomstvonyń Kazinform agenttigine bergen jaýabynda.
Bul turǵyda mınıstrlik 2026 jyly testileý formatyna eshqandaı ózgeris engizý josparlanbaǵanyn atap ótti.
- Barlyq ózgeris ǵylymı turǵydan zerdelenip, sheteldik jáne otandyq tájirıbeli maman-sarapshylar muqııat talqylaıdy. Bilimdi baǵalaý júıesindegi ózgerister jáne olardyń mańyzdylyǵy, sondaı-aq nátıjeleri boıynsha jumystar túsindiriledi, - dep atalyp ótken vedomstvo aqparatynda.
Eske salsaq, QR Ǵylym jáne joǵary bilim mınıstrligi jáne ETS bilim berý jáne talanttardy damytý salasyndaǵy halyqaralyq uıymy elimizdiń joǵary oqý oryndaryna túsýge arnalǵan negizgi quraly – Ulttyq biryńǵaı testileýdi (UBT) transformatsııalaýǵa baǵyttalǵan strategııalyq áriptestikti bastaıdy.
Bul turǵyda Qazaqstanda UBT formaty halyqaralyq standarttarǵa saı jańartylady. UBT-ny jańa formatqa kóshirý aıasynda 2027 jyly jańa joba usynylýy múmkin.