UBT-nyń ekinshi aptasy: Talapkerlerdiń 65%-y shekti ball jınady
ASTANA. KAZINFORM — 2026 jyldyń 10 mamyrynda bastalǵan negizgi UBT 92 myńǵa jýyq ret tapsyryldy, dep habarlaıdy Ǵylym jáne joǵary bilim mınıstrliginiń baspasóz qyzmeti.
Talapkerlerdiń 71%-y testileýdi qazaq tilinde, 29%-y orys tilinde jáne 164 adam aǵylshyn tilinde tapsyrdy.
— Ekinshi aptanyń qorytyndysy boıynsha talapkerlerdiń 65%-y shekti ball jınady. Bes pán boıynsha ortasha ball 63 baldy qurady. Eń joǵary nátıje — 138 ball. Erekshe bilim berý qajettilikteri (EBQ) bar oqýǵa túsýshiler úshin qolaıly jaǵdaı jasaýǵa erekshe kóńil bólinedi. UBT-ǵa EBQ bar 235 talapker qatysty, — delingen mınıstrlik taratqan aqparatta.
Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Nátıjeleri bar sertıfıkattar apellıatsııa qarastyrylǵannan keıin jeke kabınetterde qoljetimdi bolady.
UBT-ny ótkizýdiń ekinshi aptasynda 178 ereje buzýshylyq anyqtaldy. 103 talapker smartfondardy, smart kózildirikterdi, mıkro qulaqqaptardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 75 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Ózge adamdardyń ornyna kirý faktileri anyqtalǵan joq.
2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Esterińizge sala ketsek, 240 myńǵa jýyq talapker testileýge qatysýǵa eki múmkindikti esepke alǵanda 446 myńnan astam ótinish bergen.
Buǵan deıin habarlanǵandaı, endi UBT sertıfıkatymen Malaızııa JOO-laryna túsýge bolady.
