UBT-niń 50 baldyq mejesin qaraǵandylyq 398 túlek eńsere almady
QARAǴANDY. 9 maýsym. QazAqparat - Qaraǵandy qalasynda Ulttyq biryńǵaı testileýdi (UBT) tapsyrý kezinde 398 túlek UBT-niń 50 baldyq «tabaldyryǵynan» asa almady, al aldyn ala málimetter boıynsha ortasha ball 78,59-dy qurady.
Bul týraly qalalyq bilim berý bóliminen habarlady.
Vedomstvonyń málimetterinshe, Qaraǵandyda UBT-ni mektepterdiń 1700-ge jýyq túlegi tapsyrdy. UBT-ny tapsyrý úsh joǵarǵy oqý ornynda uıymdastyryldy jáne olar 3-5 maýsym kúnderi aralyǵynda ótti.
Aldyn ala málimetter boıynsha, UBT-da Qaraǵandy mektepteriniń túlekteri ortasha alǵanda 78,59 ball jınady. Ótken jyly bul kórsetkish 83 baldy quraǵan bolatyn.
«Negizinde, tómendeý úderisi túsinikti. Bıyl test tapsyrmalarynyń bazasy tolyǵymen jańartyldy. Túlekter daıyndyq testileý kezinde jańa tapsyrmalarǵa kezikken joq. Árıne, olarǵa qıyn boldy. 78,59 ball obektıvti bolyp tabylady», - dep esepteıdi qalalyq bilim bóliminiń jalpy jáne orta bilim sektorynyń meńgerýshisi Ǵaını Qarysova.
UBT qorytyndylary boıynsha Qaraǵandyda «Daryn» daryndy balalarǵa arnalǵan mektep birinshi orynda. Onyń túlekteri ortasha alǵanda 112 ball jınaǵan.
Bárinen kóp - 124 baldy № 93 gımnazııasynyń túlegi Aıgerim Jarmuhametova jınady. № 57 mektep-lıtseıiniń túlegi odan bir balǵa az aldy. №№ 38 jáne 45 gımnazııalardyń taǵy eki túlegi 122 balǵa qol jetkizdi. Úzdikterdiń bul «tórttigi» - «Altyn belgige» úmitkerlerdiń arasynda.
«Altyn belgige» úmitker bolǵan 79 adamnyń 36-sy ózderiniń bilim deńgeılerin dáleldep shyqty. 398 túlek 50 baldyq «tabaldyryqty» eńsere almady», - dep habarlady bilim bóliminen.
117 túlek apellıatsııaǵa bergen. Apellıatsııalyq komıssııa olardyń 13-in qanaǵattandyrdy.
Qalalyq bilim bólimi qyzmetkeriniń aıtýynsha, UBT-nyń barlyq protsedýrasy «jaqsy deńgeıde», qandaı da bir oqıǵalarsyz ótken. «Testileý kezinde túsirilim júrgizildi, olar monıtorlar arqyly kórsetilip otyrdy. Ata-analar dárishanalardaǵy kórinisti baqylaı aldy», - dep atap ótti G.Qarysova.
E.Bóketov atyndaǵy Qaraǵandy memlekettik ýnıversıtetinen habarlaǵandaı, tekserý kezinde túlekterdiń birinen sándi jatqyzylǵan shashynyń arasynan uıaly telefon tabyldy. Telefon tárkilenip alyndy, biraq boıjetken testileýge jiberildi.
