UBT-ny jańa formatqa kóshirý: 2027 jyly jańa joba usynylady
ASTANA. KAZINFORM — Ǵylym jáne joǵary bilim mınıstri Saıasat Nurbek sheteldik ETS (Educational Testing Service) kompanııasymen yntymaqtastyq elimizdegi Ulttyq biryńǵaı testileý formatyn jańartatynyn aıtty. Bul álemdegi jetekshi testileý kompanııasy TOEFL jáne GRE sııaqty jahandyq testilerdi ázirlegen.
— UTB boıynsha aıtatyn bolsaq, 2026 jyly qazirgi format saqtalady, birden aýqymdy ózgeris bolmaıdy. Birinshi kezeńde 5 jyldyq jospar eskerilgen, ıaǵnı elimizdiń test jasaqtaýshy ǵalymdary ETS kompanııasyna baryp, arnaıy oqýdan ótedi. Qazir Ulttyq testileý ortalyǵy dırektorynyń orynbasary Nurseıit Baıjanov Prınstonda arnaıy taǵylymdamadan ótip jatyr. ETS kompanııasy 80 jyldyq tarıhy bar eń myqty test qurastyratyn mekeme. TOEFL jáne GRE sııaqty negizgi testileý jobalaryn pysyqtaǵan. 2,5 myń test jasaýshy ǵalym bir jerde shoǵyrlanǵan. Ekinshi kezeńde halyqaralyq standartqa pysyqtalǵan ádistemeni daıyndaımyz. ETS osy ádistemege óziniń sertıfıkatyn beredi, — dedi S. Nurbek Parlament Májilisinde tilshiler suraǵyna jaýap bere otyryp.
Osy oraıda mınıstr atalǵan ádistemege sáıkes elimizdegi testileý jańa formatqa kóshiriledi. Negizgi maqsat — sapany kóterý.
— Ekinshi mindet — UTB júıesin halyqaralyq test qabyldaý formatyna kóshirý. Bul rette, bolashaqta bizdiń talapkerler UBT-ny tapsyryp, sol sertıfıkatymen kez kelgen sheteldik ýnıversıtetterge óte alady, — dedi vedomstvo basshysy.
Onyń sózine qaraǵanda, atalǵan bes jyldyq jospar aıasynda 2027 jyldan bastap pılottyq joba engiziledi. Talapkerlerge eski nemese jańa formatta tapsyrý jóninde tańdaý múmkindigi beriledi.
— Jańa sertıfıkat tolyqqandy qabyldanǵan jaǵdaıda, osyǵan kóshiremiz. Talapkerlerde eski nemese pılottyq formatta tapsyrý múmkindigi bolady, — dedi Saıasat Nurbek.
Mınıstr ETS kompanııasynyń qyzmetin paıdalanǵany úshin tıisti aqy tólenetinin aıtty.
— Bizdiń testilerdi otandyq ǵalymdar jazady. Ǵalymdar ETS-te oqytylady. Ádistemeni ázirlep, bizge naqtylap bergeni úshin shart aıasynda qarajat jumsalady, biraq oǵan qomaqty qarajat baǵyttalmaıdy, — dedi vedomstvo basshysy.
Budan buryn habarlanǵandaı, Prezıdent Qasym-Jomart Toqaevtyń Nıý-Iorkke jumys sapary mańyzdy saıası jáne ekonomıkalyq kelissózdermen qatar, Qazaqstannyń adamı kapıtalyn damytýǵa baǵyttalǵan birqatar strategııalyq kezdesýmen de erekshelendi. Memleket basshysy álemdik akademııalyq jáne ǵylymı ortanyń jetekshilerimen kelissóz júrgizip, bilim men ǵylym salasyndaǵy serpindi jobalardyń negizin qalady.
Osy oraıda búkil bilim berý júıesi úshin mańyzdy kezdesý ETS (Educational Testing Service) kompanııasynyń basshylyǵymen ótti. Bul álemdegi jetekshi testileý kompanııasy, ıaǵnı TOEFL jáne GRE sııaqty jahandyq testilerdi ázirlegen. Kezdesý qorytyndysy boıynsha arnaıy jumys toby qurylady. ETS-tiń úzdik mamandarynyń jetekshiligimen jáne jumyldyrylýymen bizdiń Ulttyq biryńǵaı testileýdiń (UBT) ádistemesi men mazmuny qaıtadan pysyqtalady.