UBT-ny qansha adam qazaq tilinde tapsyrdy
ASTANA. KAZINFORM – Qańtar aıynda Ulttyq biryńǵaý testileýdi (UBT) 164 myńǵa jýyq adam tapsyrdy, dep habarlaıdy QR Ǵylym jáne joǵary bilim mınıstrligi Ulttyq testileý ortalyǵynyń baspasóz qyzmeti.

Baspasóz qyzmetiniń málimetterine qaraǵanda, talapkerlerdiń 76,81%-y qazaq tilinde, 23,14%-y orys tilinde, 89 adam aǵylshyn tilinde testileýden ótti.
UBT-da shekti baldy 70,35%-ǵa jýyq talapker jınady. Ortasha balǵa keletin bolsaq, ol 65,81 baldy qurady. Eń joǵary ball – 139. Jalpy 186 talapker 130-dan joǵary ball jınady.
Testke qatysýshylardyń basym bóligi «Matematıka-Fızıka» kombınatsııalaryn tańdaǵan, atap aıtqanda, 17,5%-y tapsyrdy. «Bıologııa-Hımııa» pánderin 17,27% tańdaǵan. Sondaı-aq top-3 qataryna talapkerlerdiń 10,29% tańdaǵan «Matematıka-Informatıka» kombınatsııasy kirdi. Eń az tańdalǵan kombınatsııa – «Hımııa-Fızıka», ony 197 adam tapsyrǵan.
2025 jylǵy qańtar UBT-synyń qorytyndysy boıynsha talapkerler «Oqý saýattylyǵy» pánin joǵary deńgeıde tapsyrdy. Ortasha eseppen suraqtardyń 75,43%-yna durys jaýap berilgen. Al «Fızıkany» tapsyrǵan talapkerlerdiń tek 32,32% tapsyrmany durys oryndaǵan, olar úshin «Elektromagnıttik ındýktsııa» taqyryby qıyn boldy.
Osylaısha, UBT nátıjeleri boıynsha Ulttyq testileý ortalyǵy tek sandar emes, sonymen qatar taqyryptar boıynsha egjeı-tegjeıli taldaýdy da usynady.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda qańtar UBT-syna 392 talapker qatysqanyn aıta ketken jón.
UBT ótkizý barysynda 197 ereje buzýshylyq anyqtalǵan. Onyń ishinde 101 talapker smartfon jáne shpargalka sııaqty tyıym salynǵan zattardy alyp ótý áreketi saldarynan test tapsyrý múmkindiginen aıyryldy, al testileý kezinde erejelerdi buzǵany úshin aýdıtorııadan 96 adam shyǵaryldy. Ózge tulǵalar anyqtalǵan joq.
Talapkerler testileý aıaqtalǵannan keıin 30 mınýt ishinde apellıatsııaǵa bere aldy. Bul joly 14 myńnan astam ótinish qabyldandy, olardyń ishinde 10 ótinish qanaǵattandyryldy. Respýblıkalyq komıssııa jumysyn aıaqtady, talapkerlerdiń sertıfıkattary jeke kabınette qoljetimdi.
Aıta ketsek, 2025 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.
- Esterińizge sala ketsek, qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti ball jınamaǵandar, shyǵarmashylyq BBT-dan basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady, - delingen QR ǴJBM Ulttyq testileý ortalyǵy.
Osyǵan deıin qańtar aıyndaǵy UBT-nyń úsh aptasynda 126 myńǵa jýyq adam test tapsyrǵany týraly habarladyq.