UBT-ny almastyratyn jańa emtıhan modeli ázirlenip jatyr
ASTANA. KAZINFORM – Astanada ETS halyqaralyq uıymynyń ókilderi Admissions Insight Test (AIT) jańa qabyldaý emtıhanynyń modelin ázirleýge arnalǵan keshendi zertteý nátıjelerin tanystyrdy, dep habarlaıdy Ǵylym jáne joǵary bilim mınıstrligi.
Іs-shara barysynda qoldanystaǵy baǵalaý júıesine júrgizilgen taldaý, álemdik tájirıbelerdi salystyrmaly zertteý qorytyndylary, joǵary oqý oryndarynyń qajettilikterin zerdeleý nátıjeleri usynyldy.
Sondaı-aq kadrlyq áleýetke berilgen baǵa, baǵalaý úderisinde jasandy ıntellekt tehnologııalaryn qoldaný múmkindikteri jáne bolashaq AIT emtıhanynyń qurylymyna qoıylatyn bastapqy talaptar qarastyryldy.
– Jańa emtıhan tujyrymdamasy talapkerlerdiń akademııalyq quzyretterin keshendi baǵalaýǵa baǵyttalǵan. Pándik bilim deńgeıin anyqtaýmen qatar synı oılaý, taldaý jasaý, aqparatpen jáne akademııalyq mátindermen jumys isteý, óz oıyn júıeli ári dáleldi jetkizý, alǵan bilimin qajet jaǵdaılarda qoldaný qabiletterin baǵalaýǵa basymdyq beriledi, – delingen habarlamada.
Usynymdardyń jeke baǵyty test tapsyrmalarynyń sapasyn jetildirýge, olardyń tildik túsiniktiligin qamtamasyz etýge, ártúrli tilderdegi nátıjelerdiń salystyrmalylyǵyn saqtaýǵa jáne baǵalaý rásimderiniń obektıvtiligin arttyrýǵa arnalǵan.
Sonymen qatar test tapsyrmalarynyń qoryn damytý, test nusqalaryn avtomattandyrylǵan túrde qalyptastyrý jáne emtıhan nátıjeleri boıynsha analıtıkalyq eseptilikti jetildirý máseleleri qamtyldy.
Jańa modeldi synaqtan ótkizý kezeńinde qoldanystaǵy Ulttyq biryńǵaı testileý júıesi jumysyn jalǵastyrady.
– Barlyq ózgerister zertteý nátıjeleri, pılottyq aprobatsııa qorytyndylary, sarapshylardyń usynymdary men akademııalyq qaýymdastyqtyń pikirleri negizinde kezeń-kezeńimen engiziletin bolady, – dep atap ótti mınıstrlikten.
QR Ǵylym jáne joǵary bilim mınıstrligi Ulttyq testileý ortalyǵymen birlesip, halyqaralyq standarttarǵa saı keletin, ashyqtyq qaǵıdatyna negizdelgen jáne barlyq talapkerlerge teń múmkindik beretin ulttyq bilimdi baǵalaý júıesin jetildirýdi jalǵastyrady.
Aıta keteıik, Almatyda eki myńǵa jýyq túlek UBT-dan bas tartty.
