UBT nátıjesi boıynsha eń joǵary konkýrs qaı mamandyqtarda boldy
ASTANA. KAZINFORM — Aldaǵy jańa oqý jylyna bakalavr boıynsha 78 myńnan astam grant bólindi. Bul týraly Úkimet otyrysynda Ǵylym jáne joǵary bilim mınıstri Saıasat Nurbek málim etti.
«2024-2025 oqý jylyna bakalavr boıynsha – 78 219 grant, magıstratýraǵa – 13 113, doktorantýraǵa 2919 grant bólindi. Úmitkerlerdiń 81,43 % shekti baldy eńserdi, 18,57 paıyzy – eńsermedi», - dedi Saıasat Nurbek.
Bilim berý grantyn berý jónindegi konkýrsqa qatysý úshin ótinishterdi qabyldaý 2024 jylǵy 13-24 shilde aralyǵynda júzege asyryldy. Byltyrmen salystyrǵanda bıylǵy granttyq konkýrsqa 11 000 talapker artyq qatysty. Granttardy bekitý jónindegi sheshim Respýblıkalyq konkýrstyq komıssııasynda qabyldanyp, 3 tamyzda nátıjeleri jarııalandy.
«Memlekettik bilim berý tapsyrysynyń sońǵy 3 jylda alǵash ret 99 paıyzy ıgerildi», - dedi mınıstr.
Atap aıtqanda, konkýrs nátıjesi boıynsha áleýmettik osal toptardan 412 jetim bala, múgedektigi bar 382 adam, kópbalaly otbasynan shyqqan 3 576 bala, tolyq emes otbasydan shyqqan 933 bala, múgedek balalardy tárbıelep otyrǵan otbasydan 437 balaǵa grant berildi.
Sonymen qatar, bıyl alǵash ret qandastardy qabyldaý protsedýrasyn ózgertý nátıjesinde 1 604 qandasqa grant berildi (2023 jyly – 804 qandas).
Batys jáne halqy tyǵyz qonystanǵan óńirlerden shyqqan jastarǵa arnalǵan 5000 maqsattyq grant 100% ıgerildi.
«Aýyl sharýashylyǵy jáne veterınarııa baǵyttarynda granttardyń 100% ıgerildi. Sondaı-aq, bıyl alǵashqy ret 300 dıfferentsıaldy grant taǵaıyndaldy. Bul grantty alý úshin ótinimdi 31 000-nan astam úmitker tapsyrdy», - dedi vedomstvo basshysy.
Onyń aıtýynsha, memlekettik tapsyrystyń 60 paıyzdan astamy suranysqa sáıkes ekonomıkanyń basym baǵyttaryna kadrlardy daıarlaýǵa bólindi (ınjenerlik jáne qurylys, pedagogıkalyq, densaýlyq saqtaý, aqparattyq kommýnıkatsııalyq tehnologııalar, aýyl sharýshylyq, veterınarııa salalary).
«Jalpy alǵanda, UBT nátıjesi boıynsha eń joǵary konkýrs «Stomatologııa» (1 orynǵa 35 adam), «Halyqaralyq qatynastar» (1 orynǵa 12 adam), «Aýdarma isi» (1 orynǵa 10 adam), «Psıhologııa» (1 orynǵa 9 adam), «Quqyq» (1 adamǵa 8 adam) mamandyqtaryna, syzý pániniń muǵalimi (1 orynǵa 8 adam), shet tili muǵalimderin daıarlaý (1 orynǵa 8 adam) bilim berý baǵdarlamalary boıynsha boldy. Alaıda eń tómen konkýrs «Mehanıka», «Mal sharýashylyǵy» bilim berý baǵdarlamalaryna tıesili. Sondyqtan osyny eskerip, biz taǵy da aqparattyq jumystardy kúsheıtýimiz kerek», - dedi Saıasat Nurbek.
