UBT nátıjelerin jarııalaýda túlekterdiń aty-jónin sáıkestendirý nómirleri almastyrady - QR BǴM
ASTANA. QazAqparat - Bıylǵy jyly Ulttyq biryńǵaı testileý nátıjelerin jarııalaý kezinde túlekterdiń aty-jóni kórsetilmeıdi, tek jeke sáıkestendirilgen nómiri arqyly ǵana jarııalanady, dep málimdedi búgin Qazaqstan Respýblıkasy Bilim jáne ǵylym mınıstrliginiń Bilim berý men ǵylym salasyn qadaǵalaý komıtetiniń tóraǵasy Saıat Núsipov OKQ brıfınginde, dep habarlady primeminister.kz.
«Bıylǵy jyly ózgerister engizilip, mektep bitirýshi túlekterdiń aty-jónderi men olardyń test nátıjeleri burynǵydaı ilinbeıdi. Olar jeke sáıkestendirilgen nómirlermen almastyrylady, sondaı-aq test tapsyrýshynyń jeke sáıkestendirilgen nómirleri paıdalanylady jáne olar test tapsyrardyń aldynda beriledi», - dedi S.Núsipov.
Komıtet tóraǵasynyń sózinshe, búkil álemde test tapsyrmalarynyń nátıjeleri jeke adamǵa ǵana tıesili bolady da qupııa saqtalady.
«Bul túlekterdiń de, ata-analardyń da, ustazdardyń da talap-tilekteri, óıtkeni test nátıjelerin ilý kópshilik arasynda úlken dúrbeleń týdyrady. Bireý oqyp, bilim alady, ekinshisi onyń janynda otyryp, túk bitirmegen bolyp kóringenimen testini jaqsy tapsyryp, jaqsy upaı jınaǵan bolyp turady. Bul oqýshylar arasynda úlken qobaljý týdyrady», - dedi komıtet tóraǵasy.
Onyń aıtýynsha, UBT týraly málimetter tek Ulttyq testileý ortalyǵynyń saıtynda jáne emtıhan tapsyrý bastalǵannan keıin saǵat 15.00-de ǵana qoljetimdi bolady.
