UBT men keshendi testileý birge ótkiziledi
QR Bilim jáne ǵylym vıtse-mınıstri Asxat Aımaǵambetovtyń aıtýynsha, kóbisi atalǵan usynysty qoldap otyr. Sondyqtan kelesi jyly atalǵan eki test birge ótkiziletin bolady.
"Mınıstr Úkimet otyrysynda da osy máseleni kóterdi. Sebebi ondaı usynystar kóp. Bizdiń áriptesterimizdiń kóbisi ulttyq biryńǵaı testileý men keshendi testti biriktirý kerek dep sanaıdy. Sondyqtan tısti sheshim qabyldanýy qajet", - dedi A.Aımaǵambetov jýrnalısterge bergen suxbatynda.
Aıta keteıik, Úkimettiń ótken aptadaǵy otyrysynda mınıstr Erlan Saǵadıev Tamyz konferentsııasyna birneshe mańyzdy usynystyń shyǵarylatyny jaıynda aıtqan.
"Bizge pedagogtar men ata-analardyń tarapynan jyl boıy usynystar túsip jatady. Onyń ishinde ulttyq biryńǵaı testileý men keshendi testileý birdeı fýnktsııany atqarǵan soń, osy eki testileýdi birge ótkizýge qatysty usynys bar. Ekinshi, UBT joǵary oqý ornyna túsetin emtıxan bolǵandyqtan, ony ótkizý sharalarynan mektep muǵalimderin bosatý. Úshinshi, mektep balalaryn UBT-ǵa emes, mektep baǵdarlamalaryn ıgerýge daıyndaý qajet bolǵandyqtan, mektepterde synama, "probnyı" testterin ótkizbeý. Tórtinshi, memlekettik bilim granttaryn oqý tiline - qazaq nemese orys tilderine bólmeı taǵaıyndaý jáne taǵy birneshe usynys bar",- dedi E.Saǵadıev.
Atalǵan máselelerdiń barlyǵy bıylǵy Tamyz konferentsııasynda talqylandy. Sonyń nátıjesi boıynsha mektep muǵalimderin UBT-dan bosatatyn boldy.
Al bilim granttaryn oqý tiline - qazaq nemese orys tilderine bólmeı taǵaıyndaý máselesi áli de talqylanady.