UBT: Qyzylorda oblysynyń túlekteri «úzdik bestikke» endi
QYZYLORDA. QazAqparat- 28 tamyz kúni Qyzylordada bilim salasy qyzmetkerleriniń dástúrli tamyz konferentsııasy ótti, dep habarlady QazAqparat.
Jıyn barysynda ótken oqý jyly qorytyndylanyp, jas urpaqty tárbıeleý men oqytýdaǵy ustazdardy tolǵandyryp júrgen ózekti máseleler men aımaqtaǵy bilim berý júıesin jetildirýdegi negizgi maqsat-mindetter aıqyndaldy, respýblıkada bilim salasyna engizilip jatqan jańalyqtar tanystyryldy.
Sharaǵa Qyzylorda oblysynyń ákimi Qyrymbek Kósherbaev, QR Bilim jáne ǵylym mınıstrliginiń Mektepke deıingi jáne orta bilim departamentiniń dırektory Sholpan Karınova, QR Parlamenti Senatynyń depýtaty Murat Baqtııaruly jáne ardager ustazdar qatysty.
Aıta keteıik, tamyz keńesin oblys aýdandary da onlaın-rejim kóre aldy.
Aımaq basshysy rýhanı jańǵyrýdyń basty tiregi - ustazdar, al onyń iske asyrylatyn negizgi alańy - bizdiń oqý oryndary ekendigin atap ótti.
«Men búgin sizderdiń aldaryńyzǵa oblystyń ákimi ǵana emes, ózderińiz jaqsy biletin "Rýhanı jańǵyrý" baǵdarlamasyn iske asyrý jónindegi Ulttyq komıssııanyń múshesi jáne osy baǵdarlamanyń ár taraýy men ár qadamyn shyn júrekten jaqtaýshy, janashyr azamat retinde kelip turmyn. Rýhanı jańǵyrýdyń mektep jáne ustazdar úshin asa mańyzdy bolýynyń birneshe sebebi bar. Rýhanı jańǵyrý - memleket pen qoǵamdy ishinen jańartýdyń, adamnyń sanasyn ózgertý arqyly elge jańa sapa berýdiń álemde balamasy joq, erekshe baǵdarlama. Bul baǵdarlama ulttyq sıpatta, biraq, jeke tulǵalyq deńgeıde iske asady. ıAǵnı, qoǵamdyq sana, jeke tulǵalyq sananyń ózgerýi negizinde iske asady. Sondyqtan da, bul baǵdarlamanyń ár qadamy urpaq, ıaǵnı tulǵa tárbıeleý, azamat ósirý, maman daıyndaý jumysymen qatar júredi», - dedi oblys ákimi Qyrymbek Kósherbaev.
Aıta keteıik, oblysta bilim berý salasyn qarjylandyrý jyl saıyn artyp keledi. Sala bıýdjeti 2015 jyly 63,9 mlrd. teńgeni quraǵan bolsa, 2016 jyly 70,0 mlrd teńgege jetip, 2017 jyly 2013 jylmen salystyrǵanda 2 esege ósip, 89,3 mlrd. teńgeni qurady. Óńirde barlyǵy 293 mektep bar, olardyń 9 - bastaýysh, 24 - negizgi orta, 260 jalpy bilim beretin orta mektepter. Onyń ishinde shaǵyn jınaqtalǵan mektepter sany - 22.
Oblystyq bilim basqarmasynyń basshysy Baqytjan Saılybaevtyń aıtýynsha, sońǵy úsh jylda oblys túlekteri UBT qorytyndysy boıynsha joǵary ball jınap, respýblıkadaǵy úzdik bestiktiń quramyna enip otyr. Máselen, byltyrǵy oqý jylynda mektep bitirgen 6564 túlektiń 95% kolledjder men ýnıversıtetterde memlekettik bilim granty jáne aqyly negizde bilimderin jalǵastyrýǵa qol jetkizdi. 2017 jyly 6196 túlektiń 4123-i jańa formattaǵy UBT synaǵynan ótip, ortasha 82,4 balmen respýblıka boıynsha óz bilim deńgeıleriniń joǵary ekendigin taǵy da dáleldedi.
Konferentsııa barysynda QR Bilim jáne ǵylym mınıstrliginiń Mektepke deıingi jáne orta bilim departamentiniń dırektory Sh. Karınova, A. Altynsarın atyndaǵy Ulttyq bilim akademııasynyń vıtse-prezıdenti M. E. Muqataeva, oblystyq bilim basqarmasynyń basshysy B.Saılybaev baıandama jasap, aýdandardaǵy ustazdar onlaın-rejimde ózderiniń kókeıtesti saýaldaryn joldady. Esterińizge sala keteıik, Qyzylorda oblysynda úsh aýysymdy mektepter máselesi men balalardy mektepke deıingi bilim berýmen qamtý tolyǵymen sheshildi. Endi jyl sońyna deıin apatty jaǵdaıdaǵy mektepter máselesi túbegeıli sheshiledi dep josparlanýda.
Shara qorytyndysynda aımaq ustazdaryna oblys ákiminiń, QR Bilim jáne ǵylym mınıstrliginiń marapattary tabys etildi. Sonymen qatar Qyzylorda qalasyndaǵy Serǵalı Tolybekov atyndaǵy №3 mektep-lıtseı ujymyna 17 mln. teńgeniń sertıfıkaty berildi.
