UBT qorytyndysy boıynsha «Altyn belgiden» úmitkerge 1 ball jetpeı qalǵan jaǵdaıda, oǵan úzdik attestat beriledi - Á.Bımendına
ASTANA. 26 mamyr. QazAqparat/Aınur Kenebaeva/ - Bıyl Astana qalasy boıynsha 3650 túlek mektep bitirdi. Olardyń 3383-i, ıaǵnı 92,6 % testileýge qatysýǵa nıet tanytyp otyr. Bul kórsetkish byltyrǵy jylmen salystyrǵanda aıtarlyqtaı ósken.
Byltyrǵy kórsetkish 87% shamasynda bolǵan. Bul kórsetkishtermen búgingi baspasóz máslıhatynda qalalyq Bilim departamentiniń dırektory Ásıma Bımendına tanystyrdy.
Baspasóz máslıhaty barysynda Astana mektepteri úshin UBT tapsyrý kúnderi maýsym 4-i men 6-syna belgilengendigi jóninde aıtyldy. Testileý Qazaq memlekettik zań ýnıversıtetinde, S.Seıfýllın atyndaǵy Qazaq ulttyq agrotehnıkalyq ýnıversıtetinde jáne L. Gýmılev atyndaǵy Eýrazııa ulttyq ýnıversıtetinde ótetin bolady. Maýsym aıynyń 5-i men 7-si appelıatsııa kúnderi retinde belgilengen. Testileýge Mendeleev kestesinen basqa bógde zatty anyqtaýysh qural retinde alyp kirýge tyıym salynady. UBT barysyndaǵy tártiptiń saqtalýyn ádettegideı arnaıy bekitilgen qyzmetkerler qatań túrde baqylaýǵa alady.
Sondaı-aq Ásıma Bımendına bıylǵy jylǵy talaptarǵa engen ózgeristermen tanystyrdy. Onyń sózine sáıkes, Ulttyq biryńǵaı testileý qorytyndysy boıynsha «Altyn belgiden» úmitkerge 1 ball jetpeı qalsa, oǵan úzdik attestat beriledi. Burynǵy talaptar boıynsha «Altyn belgige» úmitker oqýshylarǵa óz bilimderin dáleldeı almaǵan jaǵdaıda, úzdik attestat berilmeıtin. Bıyl Astana qalasy boıynsha 178 bala «Altyn belgige» úmitkerler.
JOO túsýge qajetti eń tómengi ball - 50, al medıtsınalyq mamandyqtar úshin 55 - ball. Bul talap ózgermegen.
