UBT kezinde 142 ereje buzýshylyq anyqtaldy – mınıstrlik
ASTANA.KAZINFORM – Bıylǵy negizgi Ulttyq biryńǵaı testileý bastalǵannan beri 116 myńǵa jýyq synaq ótkizildi. Bul týraly Ǵylym jáne joǵary bilim mınıstrliginiń baspasóz qyzmeti habarlady.
Atap aıtqanda, 2025 jylǵy 16 mamyrda bastalǵan negizgi UBT aıasynda talapkerlerdiń 72 paıyzy testileýdi qazaq tilinde, 28 paıyzy orys tilinde tapsyrsa, 114 úmitker synaqty aǵylshyn tilinde tapsyrǵan.
Ekinshi aptanyń qorytyndysy boıynsha test tapsyrýshylardyń 66,8 paıyzy shekti ball jınaǵan. Bes pán boıynsha ortasha kórsetkish 64 ball boldy. Eń joǵary nátıje – 140 ball Túrkistan oblysynyń talapkeri Ábilhan Jánibektiń enshisinde.
Ol bul kórsetkishke testileýdiń alǵashqy aptasynda qol jetkizgen.
Mınıstrlik málimetinshe, talapkerler arasynda eń kóp tańdalǵan pánder kombınatsııasy – «Matematıka-Fızıka» (19%), «Shyǵarmashylyq emtıhan» (15%) jáne «Bıologııa-Hımııa» (14%).
Erekshe bilim berý qajettilikteri bar talapkerler úshin jasalǵan qolaıly jaǵdaılardyń arqasynda 384 úmitker UBT-ǵa qatysqan.
UBT-ny ótkizýdiń alǵashqy aptasynda 142 ereje buzýshylyq faktisi tirkelgen. 68 talapker tyıym salynǵan zattardy – smartfondar men shpargalkalardy – aýdıtorııaǵa alyp kirmek bolǵany úshin testten shettetildi. Taǵy 74 adam testileý barysynda ereje buzǵany úshin aýdıtorııadan shyǵarylyp, olardyń nátıjeleri joıylǵan. Ózge tulǵanyń ornyna kirý derekteri tirkelmegen.
2025 jylǵy UBT aıaqtalǵannan keıin kúntizbelik jyldyń 31 qazanyna deıin barlyq beınejazbaǵa taldaý júrgiziledi. Eger testileý kezinde ereje buzý nemese tyıym salynǵan zattardy paıdalaný faktileri anyqtalsa, talapkerdiń nátıjeleri joıylady.
Aıta keteıik, test tapsyrǵannan keıin 30 mınýt ishinde talapkerler test mazmuny boıynsha apellıatsııaǵa ótinish bere alady. Al tehnıkalyq sebepter boıynsha ótinishter testileý kezinde qabyldanady. Apellıatsııa qaralǵan soń, nátıjeleri bar sertıfıkattar talapkerlerdiń jeke kabınetterine júkteledi.
Buǵan deıin el aýmaǵynda negizgi ulttyq biryńǵaı testileý 16 mamyrda bastalǵany jaıly jazǵanbyz.