UBT kezindegi buzýshylyqtar sany 3,3 paıyzǵa ósken - BǴM
ASTANA. QazAqparat - Bıyl baqylaýdy kúsheıtý jáne basqa da sharalar qabyldaý nátıjesinde UBT kezinde anyqtalǵan buzýshylyqtar sany 3,3 paıyzǵa artty.
Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Bilim jáne ǵylym mınıstrliginiń Bilim berý men ǵylym salasyn qadaǵalaý komıtetiniń tóraǵasy Saıat Núsipov málim etti.
Komıtet tóraǵasynyń aıtýyna qaraǵanda, Ulttyq biryńǵaı testileý barysynda 51 myń 307 buzýshylyqtar tirkelgen. Sonyń ishinde erejeni óreskel buzǵan 48 oqýshy testileýden shyǵarylyp, olardyń testik nátıjeleri joıylǵan.
«Respýblıkalyq appelıatsııalyq komıssııaǵa 347 shaǵym kelip tústi. Sonyń 38 paıyzy qanaǵattandyryldy. Sonymen qatar, 2015 jylǵy Ulttyq biryńǵaı testileýdiń jaǵymdy statıstıkasynyń biri testileý júıesin jetildirýge qatysty bolyp tabylady. Meniń oıymsha, shalǵaıdaǵy aýyldardan UBT on pýnktin ashý jalpy bilim kórsetkishteriniń jaqsarýyna óz septigin tıgizdi», - dedi S. Núsipov.
Sonymen qatar, UBT daıyndyǵy men ótkizýge qatysty komıtet tóraǵasy Qyzylorda oblysynyń Jalaǵash aýdanyn erekshe atap ótti.
«Bul óńirde oqýshylar ózderiniń kórsetkishin shamamen on paıyzǵa jaqsartty. Atap óterligi, Jalaǵash aýdanyndaǵy test barysynda biz birde-bir tyıym salynǵan zattardy tárkilegen joqpyz. Óıtkeni, bunda baqylaýdyń joqtyǵy emes, oblystyq, aýdandyq bıliktiń jaqsy jumysynyń, oqýshylardyń ózderiniń belsendiliginiń arqasy. Jalpy Jalaǵash aýdany jyl ótken saıyn oqý sapasyn arttyryp, basqa aýdandarmen salystyrǵanda sapalyq kórsetkishin jaqsartyp kele jatyr. Sondyqtan da, biz buǵan tańdanǵan emespiz», - dedi S. Núsipov.
Sonymen qatar, komıtet tóraǵasy Jalaǵash aýdanyndaǵy oqýshylar buǵan deıin Qyzylorda qalasyna baryp test tapsyryp júrgenin, sońǵy jyldary ǵana osy másele óziniń ońtaıly sheshimin tapqanyn, test tapsyrýdyń jańa pýnktteri osy aýdanda ashylǵanyn jetkizdi.
