UBT kezinde komıssııany kútý úshin ákim orynbasary dırektorlardan aqsha jınaǵan
Aıta ketý kerek, agenttik tulǵalardyń issapar kezindegi qyzmettik ókilettigin asyra paıdalaný jáne tómengi qurylymdardy tekserý máselesin baqylaýǵa alǵan. Buǵan oblystyq, aýdandyq, aýyldyq deńgeıdegi memlekettik qyzmetshilerdiń áleýmettik jeliler arqyly turaqty túrde túsetin shaǵymdary negiz boldy.
Mysaly, 20 maýsymnan 30 maýsymǵa deıin barlyq óńirlerde Ulttyq biryńǵaı testileýi ótkizildi.
«Osyǵan baılanysty, biz óńirlerge baǵyttalǵan Bilim jáne ǵylym mınıstrliginiń 169 komıssııasynyń qyzmetine operatıvtik qoldaý kórsettik. Árbir komıssııanyń quramyna 15 adamnan kirdi, sonyń ishinde muǵalimder, tehnıkalyq qyzmetkerler, baǵdarlamashylar jáne basqalar boldy. Osy jumystyń nátıjesinde biz qylmystyq quqyq buzýshylyq faktilerin anyqtadyq», - dedi QR Sybaılas jemqorlyqqa qarsy is-qımyl agenttigi qoǵammen baılanys departamentiniń dırektory Arman Berdalın brıfıngte.
Máselen, Aqtóbe oblysynda Muǵaljar aýdany ákiminiń orynbasary jáne Qandyaǵash qalasy №4 mektebiniń dırektory Bilim jáne ǵylym mınıstrligi komıssııa kezdesýlerin uıymdastyrý úshin jalpy orta jáne mektepke deıingi mekemelerdiń dırektorlarynan aqsha jınaǵan. Osy fakti boıynsha qylmystyq is qozǵaldy. Jınalǵan aqshanyń jalpy somasy - 540 myń teńge.
«Shymkent qalasynda UBT-da joǵary balǵa ýáde berip, odan ári grantqa túsýge kómek kórsetý úshin M.Keńesbaıdan aldyn ala alǵan 500 myń teńgeniń 125 myń teńgesin qaıtarý kezinde Shymkent bilim basqarmasynyń mamany ustaldy», - deıdi Arman Berdalın.
Buǵan qosa, jergilikti memlekettik organdardyń laýazymdy tulǵalary Bilim jáne ǵylym mınıstrliginiń komıssııa ókilderine, atap aıtqanda, UBT ótkizýge jaýapty tulǵalardyń bos ýaqytyn uıymdastyrǵany jóninde aqparat kelip tústi.
Atap aıtqanda, Jambyl oblysynda jergilikti fılıaldyń jetekshisi komıssııa múshelerine arnap 25 adamǵa meıramhanada ishimdik qosylǵan keremet keshki as uıymdastyrǵan.
Sondaı-aq Almatyda Bilim jáne ǵylym mınıstrliginen jiberilgen komıssııa músheleriniń beıádep is-qımyl faktileri tirkelgen, ıaǵnı olar oıyn-saýyq mekemesinde alkogoldi ishimdik ishken.
Fakti boıynsha qyzmettik tekserý bastaldy. Joǵaryda kórsetilgen áreketterge qatysty barlyq laýazymdy tulǵalar jaýapkershilikke tartylady.
