UBT-ǵa shpargalka, smartfon alyp kirgen 219 bala test tapsyrý múmkindiginen aıyryldy

ASTANA. KAZINFORM — Negizgi UBT bastalǵannan beri 164 myń ret test tapsyryldy. Onyń ishinde talapkerlerdiń 74% — qazaq tilinde, 26% — orys tilinde, 115 adam aǵylshyn tilinde testileýden ótti. 

UBT bastalǵaly shekti baldy 76% talapker jınady. Ortasha balǵa keletin bolsaq, ol — 68 ball.

Eń joǵary ball — 138.

266 adam 130 baldan joǵary kórsetkish kórsetti.

Erekshe bilim berý qajettilikteri bar balalarǵa qolaıly jaǵdaı jasaýdyń arqasynda UBT-ǵa tórt aptanyń ishinde 510 talapker qatysty.

Búgingi tańda 315 ereje buzý faktisi anyqtaldy. 

Onyń ishinde 219 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy.

Testileý kezinde ereje buzǵany úshin aýdıtorııadan 89 adam shyǵarylyp, olardyń nátıjesi joıyldy.

Beınejazbalardy tekserýden soń ereje buzǵan 7 adamnyń nátıjesi joıyldy.

Bógde tulǵalar anyqtalǵan joq.

Aıta ketsek, 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbasyna taldaý júrgiziledi.

Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda talapkerdiń UBT nátıjeleri joıylady.