UBT-ǵa ótinim qabyldaý jáne ótkizý merzimderi ózgeredi
ASTANA. KAZINFORM – «Ulttyq biryńǵaı testileýdi ótkizý qaǵıdalaryn bekitý týraly» buıryqqa ózgerister men tolyqtyrý engizilmek. Ǵylym jáne joǵary bilim mınıstriniń atalǵan ózgerister engizilgen qujaty ashyq NQA portalynda jarııalandy.
Qoǵamdyq talqylaýǵa shyǵarylyp otyrǵan qujatqa sáıkes, alǵash ret qaǵıdalarǵa akademııalyq adaldyq uǵymy engizilmek. Bul - UBT tapsyrý kezinde ár testilenýshiniń minez-qulqyn anyqtaıtyn moraldyq-adamgershilik normalarynyń, prıntsıpteri men qundylyqtarynyń jıyntyǵy, onyń ishinde aldaý, kóshirýden aýlaq bolý, akademııalyq standarttardy, adaldyq pen prıntsıptilikti ustaný.
Sonymen qatar UBT-ǵa qatysý úshin ótinish bildirip, kórsetilgen kúni testileýge qatyspaǵan bolsa, testileý ótkiziletin kúnderi aýdıtorııada (qaǵaz formatta testileý tapsyrý tiline sáıkes) oryn bolǵan jaǵdaıda jáne mynadaı dáleldi sebepter boıynsha UBT-ny ótkizý kezeńinde kelesi kúnderdiń birinde qatysý múmkindigi alǵash ret berilmek:
- densaýlyq jaǵdaıy boıynsha № QR DSM-175/2020 buıryǵymen bekitilgen № 026/e nysanyna sáıkes dárigerlik-konsýltatsııalyq komıssııanyń qorytyndysy ne ambýlatorııalyq kartadan nemese testileý ótkiziletin kúnmen sáıkes keletin aýrý tarıhy bar úzindi kóshirmesimen medıtsınalyq karta bolǵan kezde;
- «Jalpy bilim beretin pánder boıynsha respýblıkalyq jáne halyqaralyq olımpıadalar men ǵylymı jobalar konkýrstarynyń (ǵylymı jarystardyń), oryndaýshylar konkýrstarynyń, kásibı sheberlik konkýrstarynyń jáne sporttyq jarystardyń tizbesin jáne olardy irikteý ólshemsharttaryn bekitý týraly» Qazaqstan Respýblıkasy Bilim jáne ǵylym mınıstriniń 2011 jylǵy 7 jeltoqsandaǵy № 514 buıryǵymen bekitilgen (Qazaqstan Respýblıkasynyń Ádilet mınıstrliginde 2011 jyly 27 jeltoqsanda № 7355 tirkelgen) respýblıkalyq jáne halyqaralyq olımpıadalar men ǵylymı jobalar konkýrstaryna (ǵylymı jarystar), oryndaýshylar konkýrstaryna, kásibı sheberlik konkýrstaryna jáne sporttyq jarystarǵa qatysqan jaǵdaıda.
Munan bólek, elektrondyq formattaǵy UBT-ǵa qatysý úshin onlaın rejımde qujattar qabyldaý ýaqyttary da ózgeredi:
- kúntizbelik jylǵy 20 jeltoqsan men 30 jeltoqsan aralyǵy;
- 10 sáýir men 25 sáýir aralyǵy;
- 25 shilde men 5 tamyz aralyǵy.
Elektrondyq formattaǵy UBT ótkizý merzimindegi ózgerister mynadaı:
- kúntizbelik jylǵy 1 naýryz ben 11 sáýir aralyǵy;
- 10 mamyr men 10 shilde aralyǵy.
Kúntizbelik jylǵy 10 mamyr men 10 shilde aralyǵynda UBT tapsyratyn tulǵalar úshin beıindik pánder kombınatsııasyn ózgertýge jol berilmeıdi.
Osyǵan deıin naýryz aıynda ótetin UBT-ǵa ótinish qabyldaý bastalǵany týraly jazdyq.