UBT-ǵa Qazaqstan mektepteriniń 78 paıyz túlegi qatysady
ASTANA. 29 mamyr. QazAqparat - Qazaqstan Ulttyq biryńǵaı testileýdi ótkizýge daıyn. Bul týraly búgin brıfıngte QR Bilim jáne ǵylym vıtse-mınıstri Mahmetqalı Sarybekov málim etti.
Onyń sózine qaraǵanda, bıyl UBT-ǵa 121 myń adam qatysady, bul bıylǵy mektep túlekteriniń 78 paıyzyn quraıdy.
UBT maýsymnyń 1-nen 15-ne deıin arnaıy jabdyqtalǵan 154 qosynda ótkiziledi. 107 qosyn aýdan ortalyǵy men qala mektepterinde, al 47-si Astana jáne Almaty qalalary men oblys ortalyqtaryndaǵy joǵarǵy oqý oryndarynyń ǵımarattarynda ornalastyrylatyn bolady. Testileý úshin ońtaıly jaǵdaı jasaý maqsatynda 10 qosyn jańa ǵımarattarǵa kóshirildi.
UBT-nyń tehnologııasymen tanysý jáne túlekterdi emtıhanǵa daıyndaý úshin Ulttyq testileý ortalyǵy bólimsheleriniń bazasynda synaý testteri ótkizildi. Aǵymdaǵy jyly olardyń 900 000-nan astamy ótkizildi. Ulttyq testileý ortalyǵymen 900-den astam synaý suraq-kitapshalary men 200 myń UBT pánderi boıynsha qural shyǵaryldy. Jaýap berý paraqshalary daıyndalyp, baǵdarlamalyq qamtamasyz etý iske asyryldy.
142 806 tapsyrma engizilgen testileý tapsyrmalarynyń bazasy jańartyldy. Olardy maquldaý úshin 11 430 túlek qatysqan test ótkizildi. Alǵashqy ret matematıka boıynsha logıkalyq tapsyrmalar daıyndaldy, ol 1 tapsyrmadan ár nusqaǵa engiziledi. Jańa tapsyrmalardy daıyndaý men saraptama ótkizý úshin respýblıka mektepteriniń eń úzdik 166 muǵalimi tartyldy.
Bıyl UBT-ny ótkizý merzimi 15 maýymǵa deıin uzartyldy (buǵan deıin test tapsyrý merzimi 10 maýsymǵa deıin bolatyn), apellıatsııaǵa ótinish qabyldaý úshin taǵy da qosymsha 1 saǵat berildi, ıaǵnı kúnine 14 saǵatqa deıin ótinishterdi qabyldaıdy. Memlekettik komıssııanyń músheleri 11 adamnan 5-ke deıin qysqartyldy, sondaı-aq ár aýdıtorııada UBT ótkizý qosyndary 12-den artyq bolmaıdy, jalpy alǵanda nebári 1281 aýdıtorııany paıdalaný josparlanýda.
