UBT-ǵa qatysýǵa ótinishter qabyldaý aıaqtaldy
ASTANA. QazAqparat - Búgin Ortalyq kommýnıkatsııalar qyzmetinde QR Bilim jáne ǵylym vıtse-mınıstri Elmıra Sýhanberdıevanyńqatysýymen 2017 jylǵy Ulttyq biryńǵaı testileýdi ótkizýge daıyndyq barysyna arnalǵan baspasóz máslıhaty ótti, dep habarlaıdy QazAqparat.
QR Bilim jáne ǵylym mınıstrliginiń aqparatyna sáıkes, UBT-nyń jańa formaty túrli memleketterdegi emtıhandardy ótkizý boıynsha halyqaralyq tájirıbelerdi taldaý nátıjesinde ázirlendi. JOO-ǵa túsý emtıhany men bitirý emtıhandary bólek ótkiziletin memleketterdiń tájirıbesi qarastyryldy. Bul memleketterdiń qataryna Japonııa, Izraıl, AQSh jatady. Olarda UBT testileriniń mazmuny oqý qabiletin, logıkalyq oılaýdyń deńgeıin, bazalyq quzyretin, ıaǵnı fýnktsıonaldyq saýattylyqty anyqtaýdy kózdeıdi.
2016 jyldyń qazan aıynan bastap UBT jańa formaty boıynsha aqparattyq-túsindirý jumystary tolyq kólemde ótkizilýde. Test tapsyrmalaryna úsh ret saraptama júrgizildi. Barlyq tapsyrmalar testologııa talaptaryna sáıkestigine tekserildi jáne UTO-nyń bazasyna qabyldandy. «Egemen Qazaqstan» gazetinde apta saıyn testiniń úlgileri jarııalanýda. UTO saıtynda ádistemelik nusqaýlyqtarmen qatar test tapsyrmalary qosymsha jarııalanǵan.
«UBT uıymdastyrý jáne ótkizý boıynsha birqatar máseleler men qaýipter týyndaýda. Sonyń ishinde: birinshiden, keıbir bitirýshiler men olardyń ata-analarynyń oıynsha, UBT men qorytyndy attestattaýdy tapsyrý eki ese júkteme bolyp tabylady,sebebi UBT-men qatar qorytyndy attestattaýǵa da daıyndalý qajet. Ekinshiden, test tapsyrmalarynyń saraptamasy men olardyń aprobatsııasy Ulttyq testileý ortalyǵymen birneshe ret ótkizilýine qaramastan, qate suraqtardyń bolýy kúmán týdyrady. Úshinshiden, bitirýshilerdiń qatysýyn uıymdastyrý, ásirese shalǵaı eldi mekenderden kelgen mektep túlekteriniń qaýipsizdigin, testileý kezindegi psıhologııalyq qoldaýdyń kórsetilýin, sondaı-aq olardy tamaqtandyrý jáne ornalastyrýdy qamtamasyz etý kerek. Tórtinshiden, 4 mamyrdaǵy málimet boıynsha UBT-ǵa qatysýǵa bitirýshilerdiń 71 paıyzy ótinish bildirdi. 10 mamyrda ótinishterdi qabyldaý merzimi aıaqtaldy», - delingen QR BǴM aqparatynda.
