UBT-ǵa qatysqan «Altyn belgi» úmitkerleriniń 50 paıyzy óz bilimderin rastady
ASTANA. QazAqparat - UBT-ǵa qatysqan «Altyn belginiń» 4 831 úmitkeri boldy. Onyń ishinde 50 paıyzy óz bilimderin rastap, «Altyn belgi» ıegerleri atandy. Bul týraly búgin QR Bilim jáne ǵylym mınıstrligi mektepke deıingi jáne orta bilim departamenti dırektory Jańyl Jontaeva málim etti.
«Altyn belgige» 4 831 bala úmitker boldy. Sonyń búgingi kúni 2 453-i «Altyn belgige» laıyq ekendikterin dáldep shyqty. Endi oblystarda, mektepterde «Altyn belgi», úzdik attestat jáne jalpy attestatty tapsyrý rásimderi ótip jatyr. Ózderińiz bilesizder, 17 maýsym kúni barlyq mektepterde sońǵy qujattaryn tapsyrady. Sol 2 453 «Altyn belgi» ıegerleriniń 1 959-y - qazaq mektepterinde oqyǵan. Al orys mektebinde oqyǵandar sany - 469. 19-y - ózbek mektebinde oqyǵan, 6-y - uıǵyr mektebiniń túlekteri. Endi bizde bir balldy ala almaı qalǵan balalarymyz da bar. Ondaı balalarymyzdyń sany - 492. Eki balldy ala almaǵan oqýshylar - 377, úsh balldy 304 túlek jınaı almady», - dep atap ótti ol búgin Ortalyq kommýnıkatsııalar qyzmetinde ótken brıfıngte.
Aıta keteıik, aǵymdaǵy 121 myń bitirýshiniń ishinde UBT-ǵa qatysýǵa 87 myń túlek ótinish bergen. Onyń ishinde qazaq tilinde - 83 330, 23 984 bala - orys tilinde oqyǵandar. Jalpy UBT uıymdasqan deńgeıde ótti. Bıylǵy ortasha ball - 81,2 ball.
