UBT-ǵa qatysýǵa ótinishter qaı kezden bastap qabyldanatyny belgili boldy
ASTANA. KAZINFORM - 25 shildede tamyz aıyndaǵy Ulttyq biryńǵaı testileýge (UBT) qatysýǵa ótinish qabyldaý bastalyp, 5 tamyzǵa deıin jalǵasady, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Ótinishti Ulttyq testileý ortalyǵynyń app.testcenter.kz saıty nemese UTO.kz mobıldi qosymshasy arqyly berýge bolady. Testileýdiń ózi 10-15 tamyz aralyǵynda ótedi.
Tamyz UBT-sy joǵary oqý ornyna aqyly negizde túsý úshin testileýdi qaıta tapsyrýǵa nıetti talapkerlerge arnalǵan. Aldyńǵy UBT-larda shekti ball jınaı almaǵan talapkerlerge testileýden qaıta ótý múmkindigi beriledi. Sonymen qatar aldyńǵy UBT-larǵa qatysqan talapkerler tamyz UBT-syna ótinish berý kezinde beıindik pánder kombınatsııasyn ózgerte alady.
Ótinish berý barysynda testilenýshiler UBT ótetin pýnktini, kúndi jáne ýaqytty ózderi tańdaıdy.
-Tamyz UBT-syna bıylǵy jáne ótken jyldardaǵy mektep pen kolledj túlekteri, qandastar (Qazaqstan Respýblıkasynyń azamattary bolyp tabylmaıtyn qazaq ultynyń ókilderi), shetelde orta bilim alǵan túlekter, shyǵarmashylyq bilim berý baǵdarlamalarynan basqa daıarlaý baǵyttaryna aýysqysy keletin stýdentter, basqa bilim berý baǵdarlamalarynan pedagogıkalyq baǵyttarǵa aýysqysy keletin stýdentter, sondaı-aq aldyńǵy oqý jylynda shekti ball jınamaǵan jáne aqyly negizde joǵary oqý oryndaryna qabyldanǵan tulǵalar qatysa alady,-delingen habarlamada.
Sonymen qatar óz mamandyǵy boıynsha joǵary oqý ornynda aqyly negizde bilimin jalǵastyrýdy josparlaǵan kolledj túlekteri áńgimelesý nátıjeleri boıynsha oqýǵa túse alady. Bul jaǵdaıda qabyldaýdy joǵary oqý oryndarynyń qabyldaý komıssııalary júzege asyrady.
Osyǵan deıin áskerı kolledj túlekteri UBT-syz áskerı ınstıtýtqa túse alatyny týraly jazdyq.
