UBT-ǵa qatysatyn talapkerler sany qansha
ASTANA. KAZINFORM — UBT-ǵa qatysý úshin 239 myńnan astam adam tirkeldi, onyń ishinde kolledj túlekteri men ótken jyldardyń mektep bitirýshileri de bar. Shamamen 200 myńy — bıylǵy mektep túlekteri.
Bul týraly Úkimet otyrysynda Ǵylym jáne joǵarǵy bilim mınıstri Saıasat Nurbek málim etti. Sonymen qatar mınıstr barlyq óńirde jergilikti atqarýshy organdar, quqyq qorǵaý qurylymdary, joǵary oqý oryndary men bilim basqarmalary qatysatyn memlekettik komıssııalar qurylǵanyn aıtty.
— Ulttyq biryńǵaı testileý 10 mamyr men 10 shilde aralyǵynda ótip jatyr. Bıyl UBT formaty ózgerissiz saqtaldy. Talapkerler testileýdi eki ret tapsyryp, grant konkýrsyna eń joǵary nátıjemen qatysa alady. Testileý aıaqtalǵannan keıin qatysýshylar durys jáne qate jaýaptar týraly aqparatpen qatar, nátıjelerdiń tolyq taldaýyn alady. Búgingi tańda testileýden 80 myńnan astam adam ótti, — dedi Úkimet otyrysynda.
Sondaı-aq joǵary oqý oryndaryna qabyldaýdyń ashyqtyǵy men qolaılylyǵyn qamtamasyz etý maqsatynda talapkerler kúntizbesi usynylyp, qujattardy qabyldaý onlaın jáne oflaın formatta júzege asyrylatynyn aıtty.
— Pedagogıkalyq jáne medıtsınalyq baǵyttarǵa túsýshiler úshin arnaıy emtıhandar qarastyrylǵan. Sonymen qatar tıisti bilim berý baǵdarlamalaryna túsýshi talapkerler úshin shyǵarmashylyq emtıhandar uıymdastyrylady. Memlekettik granttar konkýrsyna qatysýǵa ótinishter qabyldaý 13-20 shilde aralyǵynda ótedi. Joǵary oqý oryndaryna qabyldaý 25 tamyzda aıaqtalady, — dedi ol.
Sonymen qatar, ol óz sózinde 28 tamyz ben 10 qyrkúıek aralyǵynda joǵary oqý oryndarynda birinshi kýrs stýdentterine arnalǵan beıimdelý aptalyǵy ótetinin aıtty.
Aıta keteıik, 2026 jyldyń 10 mamyrynda bastalǵan negizgi UBT 92 myńǵa jýyq ret tapsyryldy.
