UBT-ǵa daıyndyq: Qazaqstanda repetıtor qyzmeti qansha
Qazaqstandyq ata-analar balasy úshin repetıtor qyzmetine jıi júrinedi. Ásirese oqý jyly aıaqtalar shaqta suranys artty. Kazinform agenttigi pedagog qyzmetiniń quny týraly surap bildi.
Repetıtorlar ózi týraly ne aıtady
Habarlandyrýda bala oqytatyn repetıtorlar óziniń jumys ótili týraly aqparat bergen. Tájirıbeli muǵalimder óziniń osy qasıetin alǵa tartady. Al jas pedagogter bolsa bilim alǵan oqý orny men oqý ádisi týraly málimet beredi. Máselen qazaq-túrik lıtseıin nemese Nazarbaev zııatkerlik mektebin bitirgenin jazady. Sonymen birge shetelde tájirıbe jınaǵanyn nemese qazir qaı JOO-da oqyp júrgenin aıtady.
Tájirıbeli muǵalimder oqytý ádisin, nátıjeni kórsetedi. Keıbiri UBT-da joǵary ball jınap, JOO-na túsken shákirtteri týraly aıtady.
Pedagogten ne kútemiz
Qazaqstandyq pedagogter onlaın jáne úıge baryp bala oqytady. Degenmen keıbiri tek qashyqtan dáris berip otyr. Astana men Almatyda otyryp-aq ózge óńirlerge onlaın baılanysqa shyǵady.
Repetıtorlar topqa nemene balanyń ózine sabaq beredi. Bul qyzmet baǵaǵa áser etedi. Ár sabaqqa bólek, keıde aıyna nemese eki aıǵa bir ret tólem jasaýǵa bolady.
Oqý ýaqyty 50 nemese 90 mınýtqa sozylady. Degenmen olardyń keıbiri 4 saǵat boıy matematıkadan esep shyǵaryp otyrýǵa bar.
Sonymen birge repetıtorlar BJB jáne TJB-ǵa daıyndap, úı tapsyrmasyn oryndaýǵa kómektesedi.
Baǵasy qansha
Baǵany salystyrǵan kezde bir saǵatqa sozylatyn daıyndyq quny qansha ekenin bildik. UBT jaqyndap keledi. Sondyqtan matematıka, qazaq tili men orys tili jáne Qazaqstan tarıhy pánderine basymdyq berildi.
Eń arzany Oral qalasynda bolyp shyqty. Munda baǵa tómen, sonymen birge qyzmet kórsetý aıasy keń. Repetıtordyń qyzmeti saǵatyna 1000-2500 teńge turady.
Qyzylorda, Pavlodar men Semeıde repetıtorlar saǵatyna 2000-3000 teńge suraıdy. Sonymen birge Kókshetaý men Tarazda baǵa osy shamada bastalyp, 4500 jáne 5000 teńgege jetedi.
Qazaqstan boıynsha repetıtor qyzmetiniń ortasha quny - 2500 teńge. Shymkent, Astana, Aqtóbe, Aqtaý, Túrkistan, Petropavl men Óskemende baǵa 2500 teńgeden bastalady. Sonyń ishinde Aqtaý men Túrkistanda tańdaý az. Eger onlaın sabaq qyzmetin alyp tastasaq, ár qalada nebári 10 repetıtordyń habardamasyn kórýge bolady.
Jezqazǵan, Almaty men Taldyqorǵanda bir saǵattyq sabaq oqytý quny 3000 teńgeden bastalady. Jezqazǵanda keıbir pedagog bul qyzmeti úshin 10 000 teńge suraıdy. Mundaı muǵalimder óte sırek.
Qostanaı men Qaraǵandyda qyzmet quny óte alshaq. Pedagogter 4000 teńge, keıbiri 12 000 teńge alady. Munda da qyzmet quny joǵary baǵalanǵan habarlama óte sırek kezdesedi. Kóbine tájirıbeli mamandar óz jumysyn joǵary baǵalaıdy.
Birinshi orynda Atyraý qalasy tur. Munda repetıtorlar saǵatyna 5000 - 6000 teńge alady. Aıtyp óteıik, elimizdiń barlyq qalasynda matematıka páninen dáris alý quny joǵary.
Eske salsaq, buǵan deıin Qazaqstanda qurylys materıaldarynyń qunyn bildik.