«UBT-dan shet tili alynyp tastaldy» – jelidegi aqparatqa túsinik berildi

NUR-SULTAN. QazAqparat – Endi mektep túlekteri shet tilinen Ulttyq biryńǵaı testileý (UBT) tapsyrmaıdy. Sebebi, bul olardy elden ketýge ıtermeleıdi – áleýmettik jelide osy mazmundaǵy aqparat taraýda, dep habarlaıdy QazAqparat.

Sondaı-aq taralyp jatqan málimette jaqynda mektepterde birqatar pándi oqytý toqtatylady. Sebebi dene shynyqtyrý páni – Qazaqstannan qalaı qashýdy, geografııa páni –qaı elge qashýǵa bolatynyn, al tarıh páni elden nelikten qashý kerektigin úıretedi. Árıne, bul ázil ekeni anyq, biraq adamdardyń kóbi muny shynaıy aqparat retinde qabyldaǵan.

Stopfake.kz saıtynyń jazýynsha, Qazaqstanda UBT-daǵy beıindik pánder tiziminen shet tilderin jáne basqa da pánderdi alyp tastaý josparlanbaǵan.

«UBT-dan shet tilin jáne basqa da pánderdi alyp tastaý týraly áleýmettik jeliler men messendjerlerde taratylǵan aqparat shyndyqqa sáıkes kelmeıdi. Resmı derekkózderden taraǵan aqparatty paıdalanýyńyzdy suraımyz», – delingen Ulttyq testileý ortalyǵynyń Instagram-daǵy resmı paraqshasynda.

«Al ázil – reseılik bloger Vera Afanasevanyń shet tilin biryńǵaı memlekettik emtıhannan (UBT analogy) alyp tastaý týraly jańalyq boıynsha jazǵan postynan alynǵan kalka.

Reseı Bilim mınıstrligi ústimizdegi jyldyń qańtarynda mindetti biryńǵaı memlekettik emtıhannan shet tilin alyp tastaý týraly sheshim qabyldaǵan bolatyn», - dep jazady Stopfake.kz.