UBT-dan eń joǵary upaıdy aýyl mektebiniń túlekteri jınaǵan

ASTANA. KAZINFORM — Negizgi UBT bastalǵannan beri 315 myń ret test tapsyryldy. Onyń ishinde talapkerlerdiń 77% — qazaq tilinde, 23% — orys tilinde, 200-den astam adam aǵylshyn tilinde testileýden ótti. 

UBT bastalǵaly shekti baldy 78% talapker jınady.

Ortasha ball — 70.

Eń joǵary ball — 140. Ony UBT altynshy aptasynda Almaty oblysynyń túlegi Jannur Eńsebek jınady. 

139 baldy 2 testilenýshi: Shyǵys Qazaqstan oblysynyń túlegi Aıaýjan Muratova men Qyzylorda oblysynyń túlegi Nurbolat Jubatqan jınady.

Atap ótsek, atalǵan úsh talapker — aýyl mektebiniń túlegi.

6 bala — 138 ball, 20 bala — 137 ball jınaǵan.

Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa jeti aptanyń ishinde 639 talapker qatysty.

Búgingi tańda 596 ereje buzý faktisi anyqtalǵan.

Onyń ishinde 375 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. 

Testileý kezinde ereje buzǵany úshin aýdıtorııadan 179 adam shyǵarylyp, olardyń nátıjesi joıyldy.

Beınejazbany tekserýden soń ereje buzǵan 42 adamnyń nátıjesi joıyldy. 

Bógde tulǵalar anyqtalǵan joq.

Aıta ketsek, 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbasyna taldaý jasalady.  

Tyıym salynǵan zattardy paıdalaný nemese ereje buzý faktileri anyqtalǵan jaǵdaıda talapkerdiń UBT nátıjesi joıylady.