UBT-dan 140 baldy qalaı alýǵa bolady – úzdikterden laıfhak
ASTANA. KAZINFORM – UBT-da mejeli 140 baldy jınaý úshin ýaqytty tıimdi paıdalaný kerek. Naýryz aıynda ótken UBT-nyń qorytyndysy boıynsha birde-bir suraqtan múlt ketpegen Aıagóz Aqqanova men Sanjar Qýandyq dál osylaı deıdi.
Jibek Joly arnasynyń «Búgin LIVE» baǵdarlamasyna suhbat bergen oqýshylar mundaı nátıjege qalaı jetkenderin aıtyp berdi.
- Bul tynymsyz eńbektiń nátıjesi dep oılaımyn. Ýaqytty tıimdi paıdalanyp, ónimdi bilim alý kerek. Mysaly, 8-9 saǵat toqtaýsyz oqýǵa bolady, biraq ol ónimsiz bolýy múmkin. Al 5-6 saǵat barlyq nazardy sabaqqa aýdaryp daıyndalsań, tipti 140 baldan da asyrýǵa bolady, - deıdi Sanjar.
Bilimpaz jastar UBT testileýine daıyndalý úshin birneshe laıfhakpen de bólisti.
- UBT-ǵa nátıjeli daıyndalýdyń ártúrli tásilderi bar. Máselen, juptasyp jumys isteýge bolady. Ózimizge bir seriktes tańdap alamyz. Sosyn belgili bir taqyrypty tereń oqyp, bir-birimizge sol taqyryp boıynsha suraq qoıamyz. Solaı eki oqýshy bir-birin daıyndaıdy. Bul óz qatelerińmen jumys isteýge, suraqtyń kez kelgen sıpatyna daıyn bolýǵa úıretedi, - deıdi Aıagóz.
Astanaǵa Almaty oblysynan alǵash ret kelip, qalanyń ásem kórinisine kózi toımaı júrgen Sanjar Qýandyq osynda oqýǵa túskisi keletinin de jasyrmady. Ol bolashaqta qazaq tili men ádebıeti pániniń muǵalimi bolýdy qalaıtynyn aıtady.
- Kóbinese bul mamandyqty qyz balalar tańdaıdy. Meniń osy mamandyqqa túskim keletinin estigende basqalar: «Nege erlerge tán mamandyq tańdamadyń?» - dep tańqalady. Menińshe, er adamnyń muǵalim bolǵany tıimdi. Meniń Batyl esimdi aǵaıym bar. Nebári 21 jasta bolsa da, onyń ózin ózi ustaýy, baısaldylyǵy meni tánti etti. Muǵalim bolýǵa motıvatsııany sol kisiden alamyn. Meniń boıyma kóptegen jaqsy qasıetti sińirip jatyr dep aıtsam bolady. Osy ustazymnan úırengenderimdi keıin balalarǵa bergim keledi, - deıdi ol.
Al Aıagóz álemde beıbitshilik bolǵanyn qalaıdy. Sol úshin halyqaralyq qatynastar jáne dıplomatııa mamandyǵynyń naǵyz maıtalmany bolǵysy keletinin aıtty.
- Armanym – elshi bolý. Memleketter arasyndaǵy janjaldardy sheshýge óz úlesimdi qosqym keledi. Álemde beıbitshilik bolǵanyn qalaımyn. Bolashaqta Qytaı, Frantsııa syndy memlekettermen jumys istegim keledi, - deıdi bolashaq stýdent.
Alda grant ıegerlerin anyqtaıtyn áli 2 testileý bar.
Eske sala keteıik, Almaty oblysynda 11-synyp oqýshysy UBT-dan 140 ball jınaǵan edi.
Sonymen qatar naýryz aıynda 22 talapkerdiń nátıjesi joıyldy.