UBT-dan 139 ball alǵan úshinshi talapkerdiń nátıjesi de tekserilip jatyr

NUR-SULTAN. QazAqparat – Bıylǵy UBT kezinde 139 ball alyp eń joǵary nátıje kórsetken úsh talapkerdiń ekeýiniń nátıjesi joıylǵan. Úshinshi talapkerdiń de test qorytyndysy tekserilip jatyr, dep habarlaıdy QazAqparat tilshisi.

Bul jaıynda Ulttyq testileý ortalyǵynyń dırektory Rýslan Emelbaev ortalyq kommýnıkatsııalar qyzmetinde ótken brıfıngte málim etti.

«Qazaqstan boıynsha 3 talapker eń joǵary 139 ball jınady. Biraq, ókinishke qaraı, eki talapkerdiń osy 139 balǵa akademııalyq adaldyqty saqtamaı, ereje buzý arqyly jetkeni anyqtalyp, UBT nátıjeleri joıyldy. Qazirgi tańda úshinshi talapkerdiń nátıjeleri de tekserilip jatyr», - dedi Rýslan Emelbaev.

Talapkerlerdiń oqýǵa túsý múmkindigi týraly da málimet berdi.

«UBT tolyq aıaqtalǵannan keıin postproktorıng júrgizilip, testileý nátıjeleri tekseriledi. Byltyr 52 talapkerdiń UBT nátıjesi joıylǵan bolatyn. Onyń ishinde 38-i memlekettik grant ıegeri edi. Talapkerdiń UBT kezinde alǵan nátıjesi joıylǵan jaǵdaıda qańtarda nemese naýryz aıynda tapsyrǵan test qorytyndysynyń negizinde aqyly oqýyna bolady», - dedi Ulttyq testileý ortalyǵynyń dırektory.

Buǵan deıin atalǵan brıfıngte Rýslan Emelbaev Face-ID júıesi inisiniń ornyna UBT tapsyrmaq bolǵan adamnyń anyqtalǵanyn aıtqan bolatyn.