UBT-da joǵary baldy repetıtorsyz alýǵa bolady - Saıasat Nurbek
ASTANA. KAZINFORM – Biryńǵaı ulttyq testileýde (UBT) joǵary ball jınaǵan túlekterdiń basym bóligi qosymsha daıyndyq ortalyqtaryna nemese repetıtorlarǵa júginetini týraly másele qoǵamda jıi kóteriledi. Bul týraly Úkimette ótken brıfıngte Ǵylym jáne joǵary bilim mınıstri Saıasat Nurbek pikir bildirdi.
Mınıstrdiń aıtýynsha, repetıtorlyq qyzmet tek Qazaqstanda ǵana emes, álemniń kóptegen elderinde bar qubylys.
– Mundaı tájirıbe tek Qazaqstanda emes, búkil álemde bar. Ásirese Azııa elderinde ata-analar balalardyń bolashaǵyna óte qatty mán beredi. Biz de azııalyq mádenıettegi qoǵam bolǵandyqtan, ata-analar balalaryna barynsha jaqsy múmkindik jasaýǵa tyrysady, – dedi ol.
Saıasat Nurbek Qytaı tájirıbesine de toqtaldy. Onyń aıtýynsha, ol elde repetıtorlyq qyzmetke shekteý engizilgenimen, bul kóleńkeli naryqtyń paıda bolýyna ákelgen.
– Mysal retinde Qytaıdy alýǵa bolady, onda repetıtorlyq qyzmet zańmen tyıym salynǵan. Biraq bul jeke repetıtorlar men daıyndyq qyzmetteriniń kóleńkeli naryǵyn kúsheıtti, óıtkeni suranys odan da joǵary boldy, – dedi mınıstr.
Onyń sózinshe, jeke ortalyqtardyń úzdik nátıjelerdi jarnama retinde paıdalanýy – naryqtyq tájirıbeniń bir bóligi.
– Meniń jeke pikirim – bul tolyq durys emes. Bul marketıng. Ortalyqtar úshin bul kórsetkish: eger oqýshy joǵary ball alsa, ony jarnama retinde qoldanady. Keıbir ortalyqtar aınalasynda úlken haıp qalyptastyrady, – dedi Saıasat Nurbek.
Sonymen birge ol bul naryqtyń quqyqtyq turǵydan retteletinin atap ótti.
– Biraq, ekinshi jaǵynan, Kásipkerlik kodeks bar. Bul – qyzmet kórsetý naryǵy. Zań kásipkerlerdiń quqyqtaryn qatań qorǵaıdy. Sondyqtan mundaı bilim berý naryǵy bar jáne ol jumys istep tur, – dedi mınıstr.
Sondaı-aq Saıasat Nurbek joǵary balldy repetıtorsyz da jınaýǵa bolatynyn atap ótti.
– Árıne, bolady. Ótken jyly da repetıtorsyz-aq joǵary ball alǵan oqýshylar boldy. Eń bastysy – júıeli daıyndyq, mekteptegi sapaly bilim jáne oqýshynyń jeke motıvatsııasy, – dep túıindedi mınıstr.
Aıta keteıik, Qyzylorda oblysynyń Shıeli aýdanyndaǵy ShoqanÝálıhanov atyndaǵy №127 orta mektep-lıtseıdiń bitirýshi túlekteri, egiz qyzdar Káýsar jáne Gaýhar Altynsary UBT-da joǵary nátıje kórsetip, aımaq mereıin ústem etti.
