UBT-da ár balǵa 7 myń teńge alǵan aqtóbelik muǵalim sottaldy

AQTÓBE. KAZINFORM – Muǵalimge túpkilikti 2 jyl 4 aı bas bostandyǵynan shekteý jazasy taǵaıyndaldy. Endi ol aldaǵy úsh jylda sabaq bere almaıdy.

Aqtóbede mektep muǵalimi UBT kezinde shekti ball jınaýǵa kómektesetinin aıtyp, eki oqýshysyn sendirdi. Tipti ár ball úshin 7 myń teńge alǵan. Alaıaqtyq jolmen aqsha tapqan pedagog isi sotta qaralyp, oǵan aıyp taǵyldy.

- Mektep muǵalimi Ulttyq birińǵaı testileýden ótkizip beretinin, 1 ball 7 000 teńge bolatynyn jetkizip, 80 ball jınaý úshin 560 000 teńge alǵan. Sot otyrysynda sottalýshy óziniń kinásin tolyq moıyndady. Sottalýshy Qylmystyq kodekstiń 190-baby 3-bóliginiń 3-tarmaǵymen kináli dep tanylyp, 3 jyl 6 aıǵa bas bostandyǵyn shekteý jazasy taǵaıyndaldy. «QR Konstıtýtsııasynyń otyz jyldyǵyna baılanysty raqymshylyq jasaý týraly» Zańyna súıenip jazanyń úshten bir bóligi qysqartyldy. Sottalýshyǵa túpkilikti 2 jyl 4 aıǵa bas bostandyǵyn shekteý jazasy taǵaıyndaldy, - dep habarlady Aqtóbe qalasy №2 sotynyń baspasóz qyzmeti.

Sonymen birge pedagog úsh jyl boıy óz mamandyǵymen jumys isteı almaıdy. Sot úkimi zańdy kúshine endi.

Eske salsaq, bıyl qańtar aıyndaǵy UBT-ǵa 90 myńǵa jýyq talapker qatysty. UBT ótkizý barysynda eki apta ishinde 173 ereje buzýshylyq tirkeldi. 108 talapker smartfon, shpargalka jáne basqa da tyıym salynǵan zattardy alyp kirmek bolǵany úshin testileýden shettetildi.