UBT-da «Altyn belgini» test tapsyrý barysynda 1 401 túlek dáleldeı aldy
ASTANA. 15 maýsym. QazAqparat - «Altyn belgige» 5816 úmitkerdiń UBT-ǵa 5761 qatysty. Onyń ishinde atalǵan belgini test tapsyrý barysynda 1401-i dáleldeı aldy.
Bul jaıynda búgin Bilim jáne ǵylym mınıstrliginde ótken baspasóz máslıhatynda atalǵan vedomstvonyń vıtse-mınıstri Mahmetqalı Sarybekov málim etti.
«100 balldan joǵary alǵandardyń sany 10755-ti qurady. UBT nátıjeleri boıynsha Almaty qalasynyń túlekteri ortasha ball 84,7 deńgeımen alǵa shyqty», - dedi vıtse-mınıstr.
Sonymen qatar Astananyń ortasha bally 78,5, Aqtóbe oblysy boıynsha 78,7 ball, sondaı-aq Soltústik Qazaqstan oblysy boıynsha 77,9 balldy qurady. Atap aıtqanda, bul óńirler boıynsha joǵary kórsetkish. Al, respýblıka kóleminde ortasha ball 70,9 qurady. Bul byltyrǵy jylmen salystyrǵanda 15,7 balǵa tómen.
«Respýblıkalyq apellıatsııalyq komıssııaǵa 1543 ótinish tústi, onyń ishinde 627-si qanaǵattandyryldy», - dedi ol.
M. Sarybekovtyń sózine qaraǵanda, UBT-ǵa barlyǵy 117432 talapker qatysty. Onyń ishinde joǵarǵy oqý ornyna túsý úshin tómengi mejeden 43 163 talapker óte almady.
