UBT-da 138 ball jınaǵan Abzal Ábdimanap túlekterge keńes berdi

NUR-SULTAN. QazAqparat – UBT-2020-nyń alǵashqy kúni eń joǵary baldy Túrkistan oblysy Ordabasy aýdanynan Abzal Ábdimanap jınady. Tespe orta mektebiniń túlegi 140 baldyń 138-in aldy. Bul týraly Bilim jáne ǵylym mınıstrliginiń baspasóz qyzmeti aqparat taratty, dep habarlaıdy QazAqparat.

Mektepti jaqsy úlgerimmen bitirgen Abzal UBT-da bıologııa jáne hımııa pánderin tańdaǵan. Endi medıtsına fakýltetine oqýǵa túsýdi josparlap otyr.

«Men UBT-ny 21 maýsym kúni tapsyrdym. Testileý suraqtary maǵan ońaı boldy, ózim oqyǵan, jaqsy biletin taqyryptar keldi. Test tapsyrý kezinde baıqaýshylar bárin qarap júrdi, joǵary baldy ózimniń taza bilimimmen alyp shyqtym», – dedi Abzal Ábdimanap.

Ózine senimdi túlek bolashaqta tis dárigeri bolýdy qalaıdy. Talapker qatarlastaryna da tek óz bilimine senýge keńes berip, sáttilik tiledi.

«Endi ózimniń júrek qalaýymmen medıtsına salasyna túskim keledi. Bolashaqta aǵalarym sııaqty tis dárigeri bolsam deımin. Ózimnen keıin tapsyratyn talapkerlerge shpargalka syndy tyıym salynǵan zattardy alyp kirmeýge keńes beremin. Óıtkeni, ony alyp kire almaısyzdar, kameradan bári kórinedi, baıqaýshylar da qarap turady. Qatarlastaryma aıtarym, tek ózderińizge senińizder, sizderge sáttilik tileımin», - dedi túlek.

Abzal bos ýaqytynda kitap oqyǵandy, sportpen aınalysqandy unatady. Túlek UBT-da 120-dan astam ball jınaýdy aldyna maqsat qoıǵan eken.

«Men aldyma maqsat qoıyp, qashanda soǵan jetýge talpynamyn. UBT-ǵa daıyndalyp júrgende 120 ball alamyn dep oıladym. Qazir 138 alǵanyma óte qýanyshtymyn», – dedi Abzal.

Budan buryn habarlanǵandaı, bıyl 21 maýsym men 5 shilde aralyǵynda elimizdiń barlyq óńirinde Ulttyq biryńǵaı testileý ótedi.

Testileýdiń alǵashqy kúninde 160 talapker ereje buzdy.

Ulttyq testileý ortalyǵynyń dırektory Dıdar Smaǵulov bıyl UBT-dan keıin barlyq aýdıtorııalardan jazylǵan vıdeolar tekseriletinin aıtqan edi.