UBT-da 132 ball jınaǵan atyraýlyq túlek Ońtústik Koreıa ýnıversıtetine oqýǵa tústi
Óńirlik kommýnıkatsııalar qyzmetiniń aqparatyna súıensek, Atyraý qalasyndaǵy Bilim-ınnovatsııa lıtseı-ınternatynyń túlegi Rızabek Alpamys bıyl UBT-dan eń joǵary 132 ball jınaǵan. Ol Ońtústik Koreıadaǵy Ulsan National Institute of Science and Technology (UNIST) ýnıversıtetine oqýǵa tústi.
Oǵan Ońtústik Koreıanyń eki aldyńǵy qatarly ǵylymı-zertteý jáne tehnologııa ýnıversıteti men Gonkongtaǵy ǵylym jáne tehnologııalar ýnıversıtetinen oqýǵa shaqyrtý kelgen.
Byltyr Rızabek Alpamys Eýropalyq fızıka olımpıadasynan kúmis, bıyl Azııa olımpıadasynan qola medal alǵan. Al, 2021-2022 jyldary halyqaralyq fızıka olımpıadasynan eki márte kúmis medal, bıyl O. Jáýtikov atyndaǵy halyqaralyq olımpıadadan da altyn medal ıemdengen.
«Maqsatym – jańa tehnologııalardy oılap tabýǵa óz úlesimdi qosý. Qazaqstandaǵy ǵylym men tehnıka salasyn damytýǵa atsalyssam degen oıym bar. Bos ýaqytymda baǵdarlamalar qurastyrǵandy, fýtbol oınaǵandy jaqsy kóremin. Biraq ýaqytymnyń kóbin ǵylymmen aınalysýǵa arnaımyn», - deıdi ol.
Ulsan National Institute of Science and Technology oqý ordasy bilim deńgeıi boıynsha álemdegi eń myqty 200 ýnıversıtettiń qataryna kiredi. Endi bul ýnıversıtette Rızabek Alpamyspen birge halyqaralyq dodalarda oza shaýyp júrgen Nurdaýlet Hajenov, Ádil Sýltanov, Ádilet Zaýythan esimdi atyraýlyq túlekter de bilim alady. Dúnıejúzi boıynsha nebary 15 túlekke beriletin granttyń tórteýin atyraýlyqtar ıelenip otyr.
