UBT: Birqatar mamandyqtar boıynsha ulttyq JOO-lardyń aqyly bólimine túsýdiń shekti baly tómendetildi
ASTANA. 31 mamyr. QazAqparat - Bıyl birqatar mamandyqtar boıynsha Qazaqstannyń ulttyq joǵary oqý oryndaryndaǵy aqyly bólimge túsý úshin UBT-nyń shekti baly tómendetildi.
Bul týraly búgin Astanada ótken brıfıngte QR Bilim jáne ǵylym mınıstrligi «Ulttyq testileý ortalyǵy» RMQK dırektory Qalı Ábdıev málim etti.
«Aǵymdaǵy jyly ulttyq joǵary oqý oryndarynyń aqyly bólimderi boıynsha kishigirim ózgerister engizildi. Atap aıtqanda, bul oqý oryndaryndaǵy aqyly bólimge túsý úshin «bilim berý», «aýylsharýashylyq ǵylymdary» jáne «veterınarııa» mamandyǵy toptaryna 60 ball jınaý jetkilikti bolady»,-dep túsindirdi Q. Ábdıev.
Osy oraıda ol ulttyq joǵary oqý oryndaryna túsýdiń eń tómengi shekti balyn 70-ke jetkizý kerektigin eske salyp ótti. Ózge JOO-larda bunyń deńgeıi - 50 ball. Al «jalpy medıtsına» mamandyǵy boıynsha kem degende 55 ball jınaý kerek.
