UBT birinshi kúni: Astanada ortasha kórsetkish 91,3 balldy qurady
ASTANA. QazAqparat - Beısenbi kúni, 2 maýsymda L.N. Gýmılev atyndaǵy Eýrazııa ulttyq ýnıversıtetinde jáne S. Seıfýllın atyndaǵy qazaq agrotehnıkalyq ýnıversıtetinde Ulttyq biryńǵaı testileý ótti, dep habarlady astana ákiminiń baspasóz qyzmeti.
Elorda boıynsha ortasha ball 91,3 qurady. Ulttyq emtıhannyń birinshi kúniniń qorytyndysy boıynsha eki túlek - qyzdarǵa arnalǵan Qazaq-túrik lıtseıiniń jáne №15 mektep-lıtseıiniń oqýshysy eń joǵary ball (124) jınaǵan.
Jalpy, 1058 oqýshy test tapsyrdy, sonyń ishinde 707-si qazaq tilinde, 351-i orys tilinde oqyǵandar. Testileý kezinde aýdıtorııadan shyǵarylǵandar nemese test nátıjelerin joıý jaǵdaılary tirkelgen joq.
Búgin testileý Qazaq gýmanıtarlyq zań ýnıversıtetinde ótip jatyr.
Eske salaıyq, Ulttyq biryńǵaı testileý 2-6 maýsym aralyǵynda ótedi.
