UBT birinshi kún qorytyndysy: Elimiz boıynsha 25 756 túlek test tapsyrdy
ASTANA. 3 maýsym. QazAqparat - Búgin Qazaqstan mektepteriniń túlekteri Biryńǵaı ulttyq testileýdi tapsyrýǵa kiristi. Birinshi kúni UBT 56 orynda ótip, oǵan 25 756 túlek qatysty. Bilim jáne ǵylym mınıstri UBT tapsyrý oryndarynyń biri - Eýrazııa ulttyq ýnıversıtetinde boldy. UBT-nyń alǵashqy kúni elorda mektepteri men Qorǵaljyn aýdany mektepteriniń oqýshylary test tapsyrdy, dep habarlady QR BǴM baspasóz qyzmetinen.
Aǵymdaǵy jyly ulttyq biryńǵaı testileýdi ótkizý formaty ózgergen joq.
Bıylǵy jyly 155 ulttyq biryńǵaı testileýdi ótkizý pýnkterinde 100 myńdaı bitirýshi óz bilimderin synaıtyn bolady.
Qazaqstan Respýblıkasy Bilim jáne ǵylym mınıstrligi barlyq óńirlerde mektep pedagogtary, túlekteri jáne olardyń ata-analarymen keń kólemde aqparattyq-túsindirý jumystaryn júrgizdi. UBT-ǵa daıyndyq jumystaryna mektep psıhologtary da at salysty. UBT-ǵa mektep túlekterin psıhologııalyq beıimdeý maqsatynda synaq testileý de ótkizildi. Ortasha eseppen alǵanda árbir oqýshy alty ret aldyn-ala synaq testileýden ótýge múmkindik aldy.
«Sondaı-aq, UBT-da qoldanylatyn test tapsyrmalarynyń qory birneshe márte saraptamadan ótip, jetekshi qazaqstandyq sarapshylardyń oń baǵasyn aldy. Qazaqstan Respýblıkasy Bilim jáne ǵylym mınıstrliginiń Memleket tarıhy ınstıtýty Qazaqstan tarıhy páni boıynsha qurastyrylǵan test tapsyrmalaryna táýelsiz saraptama júrgizdi. Endi mektep bitirýshi túlekter tanymal tulǵalardyń kıimderi men turǵyn úı bólmeleriniń sany týraly suraqtarǵa narazylyq bildire almaıdy. Mundaı suraqtar test tapsyrmalarynyń qorynda tabylmady», delingen BǴM habarlamasynda.
Árbir UBT ótkizý oryndarynda memlekettik komıssııalar, apellıatsııalyq komıssııa jumys isteıdi. Mınıstrlik janynda Respýblıkalyq apellıatsııalyq komıssııa óz jumysyn bastady.
Barlyq aýdandarda jergilikti atqarýshy organdar men memlekettik komıssııalar UBT-ny sátti tapsyrý úshin barlyq qajetti jaǵdaılardy jasady.
QR-da UBT 10-shy ret ótkizilip otyr. Ulttyq biryńǵaı testileýge 9 jyl ishinde 1 mıllıon 240 myń adam qatysty.
