UBT - bilimdi shynaıy baǵalaıtyn tásil - N.Dáýletov, BQO
ORAL. 8 maýsym. QazAqparat - UBT-nyń atqaratyn eń basty qyzmeti - syrttaı, táýelsiz baqylaý arqyly adamı sýbektıvtik faktorlardy qatystyrmaı, mektep bitirýshilerdiń 11 jyl boıy alǵan bilimin, memlekettik bilim standarty, baǵdarlamalyq materıaldyń oryndalý deńgeıin aıqyndaý.
UBT oqýshylarǵa beriletin 3,5 saǵat ýaqyttyń jetkilikti ekenin kórsetip, test suraqtarynyń baldyq kórsetkishin baǵaǵa aınaldyrýda, oqýshynyń bilim deńgeıine sáıkes keletindigi is júzinde dáleldedi. Nátıjesinde 100-den joǵary ball jınaǵan mektep túlekteri Qazaqstannyń ǵana emes, álemniń eń aldyńǵy qatarly ýnıversıtetinde grant negizinde oqý múmkindigine ıe bolyp otyr. Osyǵan oraı UBT boıynsha úzdik kórsetkishke qol jetkizip otyrǵan Oral qalasyndaǵy oblystyq daryndy balalarǵa arnalǵan mamandandyrylǵan mektep-ınternatynyń dırektory, pedagogıka ǵylymdarynyń kandıdaty Násipqalı Dáýletov óz oıyn bylaısha bildirdi.
- Bizdiń mektebimizdi bıylǵy oqý jyly 33 shákirt támamdady. 4 maýsym kúni ótken UBT synaǵyna oqýshylar tolyq qatysyp, 13-i «Altyn belgige», 8-i «Úzdik attestatqa» ıe boldy. Túlekterdiń ortasha baly 117,36 baldy qurady. Al eń joǵarǵy ball - 124, dedi ol.
Sońǵy jyldary bilim kórsetkishiniń oblystarda 10 baldaı, respýblıkada «Altyn belgi» nemese 125 ball jınaýshy túlekterdiń jyl saıyn myńǵa deıin jetýi shynaıy bilim sapasynyń kórsetkishi emes. Alaıda buǵan UBT-ny kinálaý orynsyz. Bul - testileýdi uıymdastyrýdaǵy óz kemshiligimiz. Bıyl osy kemshilikterdi joıý baǵytynda biraz shara júzege asty. Mysaly, uıaly telefondy qoldandyrmaý baǵytyndaǵy jumystar júrgizilip, testilik suraqtardyń mazmunyna ózgertýler, tyń materıaldar, logıkalyq suraqtar engizildi. Nátıjesinde qazirgi UBT-nyń aldyn ala qorytyndylary boıynsha «Altyn belgi» úmitkerleri 25-30 paıyzǵa deıin azaıyp, al 125 ball jınaýshylardyń jalpy sany 1-2 paıyzǵa deıin tómendedi. Bıylǵy kóńil aýdaratyn kemshilik, matematıka, ásirese, Qazaqstan tarıhy páninen tyń materıaldan shamadan tys kóp qamtylǵan jáne taldaýdan ótpegen, oqýshy túsinigine saı emes materıaldar kóp ushyrasady. Ol oqýshylardyń, ata-analardyń, muǵalimderdiń ulttyq biryńǵaı testileýge degen qarsy pikirlerin týǵyzdy. Sondyqtan UBT-ǵa qandaı bolmasyn, ózgerister engizýge úlken jaýapkershilikpen qarap, eń aldymen muǵalimder qaýymyna júginý kerek.
«Mektep arqyly ǵana oqýshy da, ata-ana da UBT-nyń mánin jete túsine alady. Ulttyq biryńǵaı testileý oqýshynyń shynaıy bilim sapasyn anyqtaıdy», dep túıindedi oıyn N.Dáýletov.
