UBT bilim deńgeıi áli de jetkiliksiz ekendigin kórsetti - B. Jumaǵulov
ASTANA. 18 maýsym. QazAqparat - Bıyl elimizde 117 myń bala Ulttyq biryńǵaı testileýge qatysty. Olardyń ortasha baly 70,9 paıyzdy qurady.
Kórsetkish byltyrǵyǵa qaraǵanda 16 paıyzǵa tómen. Bul týraly búgin Májiliste ótken Úkimet saǵatynda Bilim jáne ǵylym mınıstri Baqytjan Jumaǵulov málim etti.
Baıandama barysynda mınıstr UBT kórsetkishiniń tómen bolýyna qatysty birqatar sebepterdi atap ótti. «Birinshiden, bıyl uıymdastyrý jumysy asa joǵary deńgeıde boldy. Ekinshiden, biz jyl saıyn testileý tapsyrmalaryn 30 paıyzǵa aýystyryp otyrýǵa tıis edik. Ókinishke qaraı, bul másele sońǵy jyldary júrgizilmeı keldi. Sondyqtan da, oqýshylardyń ózderi «qaltalaryndaǵy» suraqtyń kezikpegenine tańǵalǵan bolar. Degenmen, bılet tapsyrmalarynyń bári memlekettik standarttar sheńberinde júzege asyp otyr», - dedi B. Jumaǵulov.
Mınıstrdiń aıtýynsha, UBT qorytyndysy boıynsha qatysýshylardyń 36 paıyzy nemese 47 myń túlek synaq «tabaldyryǵyn» eńsere almaǵan. «Meniń oıymsha, bul bizdiń mınıstrlik úshin jeńis emes. ıA, testileý ashyq, transporentti ári uqypty ótti. Degenmen, tómengi kórsetkishtiń ózi oqýshylarǵa beretin bilim berý máselesin qaıta qaraý qajettigin bildiretin tárizdi. Bilim deńgeıi áli de jetkiliksiz bolyp otyr», - dedi B. Jumaǵulov.
