UBT aralyq nátıjesi: 215 talapker test tapsyrý múmkindiginen aıyryldy
UBT-nyń aralyq nátıjesin usynǵan Ulttyq testileý ortalyǵynyń málimetine sáıkes, búginge deıin túlekterdiń 75% – qazaq tilinde, 24,8% - orys tilinde, 0,1% aǵylshyn tilinde emtıhannan ótti.
Shekti baldy 67% jýyq talapker ǵana jınaı alǵan. Ortasha ball – 66 baldy qurady.
Búgingi tańda smartfon, shpargalka jáne basqa da tyıym salynǵan zattardy alyp ótpek bolǵan 215 talapker test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 199 adam shyǵarylyp, olardyń da nátıjeleri joıyldy.
«Testileýdiń besinshi aptasy aıaqtaldy, barlyǵy shtatty rejımde ótip jatyr. Jalpy negizgi Ulttyq biryńǵaı testileýge qatysýǵa 290 myńǵa jýyq ótinish kelip tústi, olardyń ishinde 160 myń ótinish birinshi múmkindikke, 130 myń ótinish ekinshi múmkindikke berilgen. Qazirgi tańda 170 myń ret test tapsyryldy, ıaǵnı talapkerler ekinshi múmkindigin paıdalana bastady. Ótken aptamen salystyrǵanda ortasha ball 1 balǵa joǵarylady», – dep atap ótti Ulttyq testileý ortalyǵynyń dırektory Rýslan Emelbaev.
Eske salaıyq, UBT-ǵa kirgizý kezinde úsh deńgeıli júıe qoldanylady: Face ID jeke basyn sáıkestendirý arqyly, jeke kýálik boıynsha, sondaı-aq otyrǵyzý ornynda jeke basyn sáıkestendirý. Bıyl testileý «1 kompıýter – 2 kamera – 1 testilenýshi» qaǵıdatymen ótedi. Eger buǵan deıin testileý protsesin ár kompıýterdiń joǵarǵy jaǵynan baqylap otyratyn bir kamera ǵana bolsa, endi testilenýshiniń jeke basyn sáıkestendirýge jáne bógde adamdardyń kirýine jol bermeýge múmkindik beretin ekinshi (frontaldy) kamera ornatylǵan.
Talapkerler testileý aıaqtalǵannan keıin 30 mınýt ishinde apellıatsııaǵa bere alady.
