UBT: 27 mektep dırektory qyzmetten ketýi yqtımal - Qyzylorda oblysy
QYZYLORDA. 13 maýsym. QazAqparat - Qyzylorda oblysy ákimdiginde óńir basshysy Qyrymbek Kósherbaevtyń tóraǵalyq etýimen UBT-nyń qorytyndysyna arnalǵan májilis ótti.
Bıylǵy jyldyń Ulttyq biryńǵaı testileý qorytyndysy boıynsha Qyzylorda oblysy respýblıkada 11-orynnan kórindi. Aýdandar arasynda Qazaly, Shıeli men Jańaqorǵannyń deńgeıi basqalarynan tómen. UBT týraly oblys ákiminiń orynbasary Aqmaral Álnazarova jan-jaqty toqtalyp ótti. Ótken jyly táýir kórsetkish kórsete almaǵan bilim oshaqtary bul joly da jerge qaratty. Bıylǵy oqý jylynda 7755 túlektiń synaqqa 5048-i nemese 66 paıyzy qatysqan. Talapkerlerdiń ortasha upaıy ótken jyly 64,02 bolsa, bıyl 73,4-ti qurady. «Altyn belgige» úmitker 196 jastyń 62-si óz bilimderin dáleldep shyqty. Úzdik attestatqa úmitker 79 túlektiń 20-sy ǵana tıisti balǵa qol jetkize aldy. Bıyl shekti baldy jınaı almaǵandardyń sany 681-di qurady. Oblys boıynsha eń joǵary 121 balǵa eki oqýshy ǵana qol jetkizdi. Olar - Qarmaqshy aýdany men Qyzylorda qalasynan. UBT barysynda 270 qyz-jigittiń kúndeligine ekilik tústi.
Aımaq basshysy aıtqandaı, bul kórsetkishterdiń artynda júzdegen jastyń taǵdyry tur. Bilim salasyndaǵy keıbir qyzmetkerlerdiń muny túsingisi kelmeıtini ókinishti. Bul salaǵa oblys bıýdjetiniń 40 paıyzy jumsalady, al qaıtarymy kóńil kónshitpeıdi. Ádistemelik jumys durys jolǵa qoıylmaǵan. Joǵary sanatty muǵalimderdiń úlesi respýblıkalyq kórsetkishten 5 ese tómen. Jyl saıyn joǵary sanat úshin ústemeaqy tóleýge baǵyttalǵan respýblıkalyq bıýdjet qarjysy keri qaıtarylady. Mysaly, 2012 jyly - 128 mln. teńge.
- Óziniń jumysynda osyndaı kemshilik jibergen mektep dırektorlary jaýapkershilikti tek bilim basqarmasynyń aldynda emes, óziniń, halyqtyń aldynda tartýy kerek, - dedi Q.Kósherbaev. - Ne ekseń, sony orasyń! Bir orynda tapjylmaı otyryp, túk bitirmeý - naǵyz bilimsizdik. Oqýshyǵa bilim berýdiń ornyna, muǵalimniń birin alyp, birin salyp, bireýine az, bireýine kóp júkteme bólýden basqa eshteńe bilmeıtin dırektordan qandaı nátıjeli jumys kútemiz?!
Basqosýda oblys ákimi senimdi aqtaı almaǵan 27 mektep dırektory qyzmetten ketetinin aıtyp, osy salaǵa jaýapty qala jáne aýdan ákimderi orynbasarlarynyń máselesi bólek qaralatynyn jetkizdi.
Jıyndy qorytyndylaǵan Qyrymbek Kósherbaev bilim berý sapasyn joǵary dárejede qamtamasyz etý úshin kadrlyq áleýetti kúsheıtýdi mindettedi.
