UBT-2026: talapkerler eń kóp tańdaǵan beıindik pánder kombınatsııasy belgili boldy
ASTANA. KAZINFORM — Bıylǵy negizgi Ulttyq biryńǵaı testileýde (UBT) talapkerler eń kóp tańdaǵan beıindik pánder kombınatsııasy «Matematıka — Fızıka» boldy. Bul týraly QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıtetiniń tóraǵasy Gúlzat Jarasova Ortalyq kommýnıkatsııalar qyzmetinde ótken brıfıngte aıtty.
— Bıyl talapkerlerdiń 18,2 paıyzy «Matematıka — Fızıka» pánder kombınatsııasyn tańdady. Odan keıin «Bıologııa — Hımııa» (14,4%) jáne «Shyǵarmashylyq emtıhan» (12,4%) pánder kombınatsııalary tur, — dedi ol.
Komıtet tóraǵasynyń aıtýynsha, ınjenerlik-tehnıkalyq baǵyttarǵa qyzyǵýshylyqtyń artýy Memleket basshysynyń tapsyrmasyna sáıkes memlekettik bilim berý granttarynyń basym bóliginiń osy baǵyttarǵa bólinýimen baılanysty.
Aıta keteıik, negizgi UBT bıyl 10 mamyr men 10 shilde aralyǵynda ótti. Testileýge 233 myń talapker qatysyp, eki múmkindigin qosa eseptegende test 422 myń ret tapsyryldy.
UBT-ny talapkerlerdiń 73,1 paıyzy qazaq tilinde, 26,8 paıyzy orys tilinde tapsyrdy. Sondaı-aq 383 talapker aǵylshyn tilinde test tapsyrǵan.
Eske salaıyq, joǵary oqý oryndarynyń bilim berý granttary konkýrsyna qatysý úshin ótinish qabyldaý 13–20 shilde aralyǵynda júrgizilip jatyr.
