UBT-2026: 320 ereje buzýshylyq tirkeldi, 198 talapker testileýden shettetildi
ASTANA. KAZINFORM — 2026 jylǵy qańtar UBT-syn 184 myńǵa jýyq adam ótti. Talapkerlerdiń 75%-y testileýdi qazaq tilinde, 25%-y orys tilinde jáne 113 adam aǵylshyn tilinde tapsyrdy, dep habarlaıdy Ǵylym jáne joǵary bilim mınıstrligi.
Talapkerlerdiń 68%-y shekti ball jınady. Bes pán boıynsha ortasha ball 64 baldy qurady. Eń joǵary nátıje — 138 ball.
Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Bul joly 19 myńǵa jýyq ótinish qabyldanyp, olardyń ishinde 2 biregeı test tapsyrmasyna qatysty ótinishter qanaǵattandyryldy. Respýblıkalyq komıssııa jumysyn aıaqtady, talapkerlerdiń sertıfıkattary jeke kabınette qoljetimdi.
Testke qatysýshylardyń basym bóligi «Matematıka-Fızıka» kombınatsııalaryn tańdaǵan, atap aıtqanda, 19,2%-y tapsyrdy. «Bıologııa-Hımııa» pánderin 16,8% tańdaǵan. Sondaı-aq, top-3 qataryna talapkerlerdiń 9,8% tańdaǵan «Shyǵarmashylyq emtıhan» kombınatsııasy kirdi.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa 446 talapker qatysqanyn aıta ketken jón.
— UBT-ny ótkizý barysynda 320 ereje buzýshylyq anyqtaldy. 198 talapker smartfondardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 120 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Beıne baqylaýdy tekserý nátıjesinde 2 adamnyń sertıfıkaty joıyldy. Ózge adamdardyń ornyna kirý faktileri anyqtalǵan joq, — delingen mınıstrlik taratqan aqparatta.
2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Osyǵan deıin depýtat UBT-ǵa daıyndalýǵa múmkindik beretin onlaın-platformany iske qosýdy usyndy.