UBT–2025: emtıhanǵa daıyndyq kýrsynyń baǵasy qansha
ASTANA. KAZINFORM — UBT-ǵa daıyndyq kýrsynyń baǵasy óńirlerde ártúrli. Oǵan pedagogtiń deńgeıi, daıyndyqtyń qalaı ótetini jáne ýaqyty áser etedi. 2025 jylǵy daıyndyq kýrsynyń baǵasy týraly Kazinform agenttiginiń tilshisi anyqtady.
Oral men Óskemende testke daıyndyq quny elimiz boıynsha eń tómen bolyp tur. Munda UBT-ǵa qajetti pánderdi tereń meńgerý úshin 25-50 myń teńge tóleıdi. Oǵan 5 pán kiredi. Onyń úsheýi mindetti pánder bolsa, qalǵan ekeýi mamandyqqa baılanysty tańdalǵany. Oqý ortalyqtarynyń keıbirinde baǵa odan joǵary. Sonymen birge Oral qalasynda bir saǵattyq daıyndyq kýrsynyń quny 4 000-7 000 teńge bolsa, Óskemende qyzmettiń bul túri – 2 000-3 000 teńge.
Semeı men Qostanaıda baǵa sál joǵary. Munda top bolyp daıyndalý quny – 25-50 myń teńge. Qosymsha daıyndalý úshin akademııalyq saǵatqa 1 800-2 500 teńge suraıdy. Repetıtorlar úıge kelip oqytsa 1 500-10 000 teńge tóleısiz. Kóbine baǵa – 2 500-4 000 teńge aralyǵynda. Keı ortalyqtarda baǵa joǵary. Rýdnyı qalasynda UBT-ǵa daıyndyq kýrsynyń quny – 80-100 myń teńge.
Aqtóbe, Túrkistan, Qonaev pen Atyraýda baǵa ózge óńirlerge qaraǵanda ortasha. Oflaın sabaq oqý, testke daıyndalý úshin shamamen 30-60 myń teńge kerek. Al jeke kýrs alsańyz 2 000-6 000 teńge tóleısiz.
Taraz, Qaraǵandy men Jezqazǵanda daıyndyq kýrsynyń baǵasy sál joǵary. Onlaın mektepter aı saıyn 40-70 myń teńge suraıdy. Al oflaın daıyndyq kýrsynyń baǵasy 65-100 myń teńge aralyǵynda. Úsh pánge daıyndalý úshin aptasyna úsh kún kýrsqa qatysady. Taraz qalasynda ózge de usynystardy qaraýǵa bolady. Jeke repetıtor saǵatyna 3 000-10 000 teńge alady.
Qyzylorda, Pavlodar men Shymkentte UBT-ǵa daıyndyq kýrsynyń quny aıyna 50 myń teńgeden bastalady. Oqý ortalyqtarynyń kóbinde baǵa – 80 000 teńge. Eger tek bir pánnen ǵana daıyndalýdy uıǵarsańyz aıyna 15-20 myń teńge kerek. Bul óńirlerde repetıtorlar orta eseppen 2 000-4 000 teńge suraıdy. Ońtústikke qaraǵanda Pavlodarda qyzmettiń bul túri eki ese arzan.
Aqtaý, Taldyqorǵan, Petropavlda UBT-ǵa daıyndyq kýrsynyń eń tómeni 60 myń teńge bolyp tur. Aqtaý qalasynda testke úıde otyryp daıyndalǵan kezde repetıtor saǵatyna 2 000 – 3 500 teńge alady. Petropavlda – 4 000-6 000, Taldyqorǵanda – 4 000-5 000 teńge. Tańdaý pánine qaraǵanda mindetti pán muǵalimderiniń daıyndyq kýrsyna 10-20% qymbat bolyp keledi.
Almaty, Astana men Kókshetaýda UBT-ǵa daıyndalý kýrsynyń baǵasy joǵary. Almaty qalasynda kýrstyń eń arzany aıyna – 60-90 myń teńge aralyǵanda. Jeke dara oqytý kýrsynyń quny saǵatyna 4 000 teńgeden bastalady. Qazir bos pedagogti tabý qıyn. Kóbiniń kestesi tyǵyz, olardyń bári bir jyldyq daıyndyq josparyn bekitip qoıǵan.
Astanada bes pánge arnalǵan oflaın kýrsty 100 myń teńgege usynady. Al tórt pánnen turatyn onlaın daıyndyq quny – 75 myń teńge. Astanalyq repetıtorlar saǵatyna 3 000 – 5 000 teńge alady.
Elimiz boıynsha UBT-ǵa daıyndyq kýrsy Kókshetaý qalasynda joǵary. Bes pánge aı saıyn 80-120 myń teńge kerek. Al eger aptasyna bes kún qatar daıyndyq ótkizse, kýrs quny 140 myń teńgeden joǵary bolady. Esesine aralyq testke daıyndaıdy, qatemen jumys isteıdi, sheshýi qıyn suraqtarǵa basymdyq beredi. Ortalyq ishinde bir pánge daıyndaý quny – 35 myń teńgeden joǵary. Al jeke repetıtorlar saǵatyna 4 000–6 000 teńge suraıdy.
Buǵan deıin Qazaqstandaǵy JOO-lardyń oqý aqysy týraly jazyldy.