UBT-2024: Ereje buzǵany úshin 628 talapkerdiń nátıjeleri joıyldy
ASTANA. KAZINFORM — 2024 jylǵy negizgi UBT keshe aıaqtaldy. Ulttyq testileý ortalyǵy onyń qorytyndy málimetimen tanystyrdy.
Respýblıka boıynsha 181 myńnan astam talapker (eki múmkindikti esepke alǵanda 326 myń ret) UBT tapsyrdy.
Onyń ishinde:
Talapkerlerdiń 75,1% - y qazaq tilinde, 24,8% - y orys tilinde, 168 adam aǵylshyn tilinde testileýden ótti;
- shekti baldy 76,4%-ǵa jýyq (139 myń) talapker jınady;
- ortasha ball – 68 ball;
- 641 erekshe bilim berý qajettiligi bar bala qatysty;
- eń joǵary ball – 140.
Ereje buzǵany úshin 628 adamnyń nátıjeleri joıyldy. Atap ótsek:
smartfon, shpargalka jáne basqa da tyıym salynǵan zattardy alyp ótý áreketi saldarynan 393 talapker test tapsyrý múmkindiginen aıyryldy;
- testileý kezinde erejelerdi buzǵany úshin aýdıtorııadan 188 adam shyǵaryldy;
- beınejazbalardy tekserýden soń ereje buzǵan 47 adamnyń nátıjesi joıyldy;
- bógde tulǵalar anyqtalǵan joq.
Aıta keteıik, bıyl 65 myńnan astam apellıatsııalyq ótinish kelip tústi. Apellıatsııany qarastyratyn komıssııa jumysyn 13-14 shilde aıaqtaıdy, sodan keıin talapkerlerdiń sertıfıkattary Jeke kabınette qoljetimdi bolady.
Sondaı-aq UBT kezeńinde elektrondyq poshta, call-ortalyq, áleýmettik jeliler boıynsha 300 myńǵa jýyq ótinish óńdeldi.
Esterińizge sala keteıik, 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.
